Aran Sei

கிழக்கு ஜெருசலேம் – பாலஸ்தீனியர்களை வலுக்கட்டாயமாக வெளியேற்றி இஸ்ரேலிய குடியேறிகளை அமர்த்துவதை எதிர்த்த இயக்கம்

image credit : thewire.in

ரண்டு வாரங்களுக்குள் 27 பேரைக் கொண்ட ஆறு பாலஸ்தீனிய குடும்பங்கள் அவர்களது வீடுகளிலிருந்து துரத்தப்பட்டு தெருக்களில் விடப்படுவார்கள், அவர்களது இடத்தில் இஸ்ரேலிய குடியேறிகள் அமர்த்தப்படுவார்கள்.

ஆக்கிரமிக்கப்பட்ட கிழக்கு ஜெருசலேம் பகுதியான ஷேக் ஜர்ராவைச் சேர்ந்த இந்தக் குடும்பங்களில் விதி கிட்டத்தட்ட கல்லில் பொறிக்கப்பட்டதாக உள்ளது: ஒரு இஸ்ரேலிய மாவட்ட நீதிமன்றம் அவர்களது முறையீட்டை சென்ற பிப்ரவரி மாதம் நிராகரித்தது, மே 2, 2021 க்குள் தங்களது வீடுகளை காலி செய்ய வேண்டும் என்று உத்தரவிட்டது.

65 ஆண்டுகளுக்கு மேலாக அங்கு வசித்து வரும் இந்தக் குடும்பங்கள் தமது வீடுகளை விட்டு வெளியேறா விட்டால், இதற்கு முன்னர் அவர்களது பக்கத்து வீட்டுக்காரர்கள் அகற்றப்பட்டதைப் போலவே, இவர்களும் இஸ்ரேலிய அதிகாரிகளால் வலுக்கட்டாயமாக வெளியேற்றப்படுவார்கள்.

அடுத்த இரு வாரங்களில் இஸ்ரேலிய குடியேறிகள் தமது வீடுகளை கைப்பற்றுவதை தடுப்பதற்கு எல்-குர்த், அல்-காசிம், ஸ்காபி, அல்-ஜாவ்னி ஆகிய குடும்பங்களுக்கு மீதியிருக்கும் ஒரே நம்பிக்கை, இஸ்ரேல் உச்சநீதிமன்றத்தில் மேல்முறையீடு செய்வதுதான். இஸ்ரேல் உச்சநீதிமன்றம், நீண்ட காலமாகவே ஜெருசலேம் போன்ற இடங்களில் நகரத்தின் பாலஸ்தீனிய குடிமக்களின் உரிமைகளுக்கு எதிராக இஸ்ரேலிய குடியேறிகள் திட்டங்களை ஆதரிக்கும் நீண்ட வரலாற்றைக் கொண்டுள்ளது.

கடந்த பல ஆண்டுகளில், இஸ்ரேலிய நீதிமன்ற உத்தரவுகளின் பேரில், இந்தக் குடும்பங்களின் உறவினர்கள், நண்பர்கள், பக்கத்து வீட்டுக்காரர்கள் என்ற பல டஜன் குடும்பங்கள் வெளியேற்றப்பட்டு, அந்த இடங்களில் இஸ்ரேலிய குடியேறிகள் அமர்த்தப்பட்டுள்ளனர்.

மே 2-ம் தேதி வெளியேற்றப்படுவோம் என்ற கெடு, 22 வயதான எழுத்தாளரும் கவிஞருமான முகமது எல்-குர்தின் மனதை அழுத்திக் கொண்டிருக்கிறது. அவரது குடும்பத்தின் உடைமைகள் தெருவில் வீசியெறியப்பட்டு, அவரது வீட்டில் பாதியை இஸ்ரேலிய குடியேறிகள் கைப்பற்றிய போது, முகமது எல்-குர்துக்கு வயது 11தான்.

“அன்று இங்கு இருந்த எல்லா இஸ்ரேலிய போலீஸ் படைகளையும் நான் நினைவில் வைத்திருக்கிறேன், அவர்கள் ஒலி குண்டுகளை சுடுவதையும், அவர்களை தடுக்க முயற்சிக்கும் மக்களை அடிப்பதையும் நினைவில் வைத்திருக்கிறேன். அவர்கள் நகரத்தின் பிற பகுதிகளிலிருந்து இந்தப் பகுதியை முற்றிலும் அடைத்து விட்டார்கள், யாரும் உள்ளே வரவோ, வெளியே போகவே அனுமதிக்கப்படவில்லை” என்கிறார், அவர்.

“தங்களுக்குத் தேவையில்லாத பொருட்களை அவர்கள் வெளியே எறிந்தனர், எங்கள் உடைமைகளி்ல அவர்களுக்கு என்னென்ன தேவையோ அவற்றை அவர்கள் அப்படியே வைத்துக் கொண்டார்கள்” என்றார் அவர்.

குடியேறிகள் வைத்துக் கொண்ட பொருட்களில் ஒன்று முகமது எல்-குர்துவின் குட்டித் தங்கையின் தொட்டில், அடுத்த நாள், அந்தத் தொட்டிலை வீட்டின் முன் முற்றத்தில் எரித்து கொண்டாடினார்கள் என்கிறார் அவர்.

ஷேக் ஜர்ராவில் குடியிருக்கும் எஞ்சிய பாலஸ்தீனியர்கள், தாங்கள் வலுக்கட்டாயமாக வெளியேற்றப்படுவதற்கான கெடு நெருங்க நெருங்க, அவர்களது வழக்கின் மீது சர்வதேச கவனத்தைக் கொண்டு வருவதற்கு அவர்களால் முடிந்த எல்லாவற்றையும் செய்கின்றனர். அத்தோடு கூட இஸ்ரேல் மீது சர்வதேச அழுத்தத்தையும் கொண்டு வர முயற்சிக்கின்றனர். இதற்காக, ” #SaveSheikhJarrah (ஷேக் ஜர்ராவைக் காப்பாற்றுங்கள்)” என்ற இயக்கத்தை நடத்தி வருகின்றனர்.

இந்த ஹேஷ்டேக் பாலஸ்தீனிய சமூக ஊடகங்களில் பல வாரங்களாக பரவி வருகிறது. “நடந்து கொண்டிருக்கும் நக்பா” வை முடிவுக்குக் கொண்டு வரும்படி இஸ்ரேலுக்கு அழுத்தம் கொடுக்கும்படி சர்வதேச தலைவர்களுக்கும், வழக்கறிஞர்களுக்கும் இந்தப் பகுதியில் உள்ள செயல்பாட்டாளர்கள் அழைப்பு விடுத்துள்ளனர்.

நக்பா என்பது பேரழிவு என்பதற்கான அரேபிய சொல். 1948-ல் இஸ்ரேலிய அரசு அமைக்கப்பட்ட பிறகு தமது வீடுகளிலிருந்து பாலஸ்தீனிய மக்கள் பெருந்திரளாக வெளியேற்றப்பட்டதை குறிக்க அது பயன்படுத்தப்படுகிறது.

உள்ளூர் பாலஸ்தீனிய குடிமக்களால் நடத்தப்படும் தினசரி பிரச்சார சுற்றுலாக்களும், வாராந்தர உள்ளிருப்புப் போராட்டங்களும் ஆர்ப்பாட்டங்களும், சமீப வாரங்களில் ஷேக் ஜர்ராவின் நிலைமை மீது சர்வதேச கவனத்தை அதிகமாகக் குவித்துள்ளது.

image credit : thewire.in
இஸ்ரேலுடன் உறவுகளை ஏற்படுத்திக் கொள்ளும் ஐக்கிய அரபு அமீரகத்துக்கு எதிராக, சென்ற ஆண்டு ஆகஸ்ட் மாதம் இஸ்ரேல் ஆக்கிரமித்துள்ள மேற்குக் கரையில் நடந்த ஆர்ப்பாட்டம் – image credit : thewire.in

சென்ற வாரம் அமைதியான ஒரு எதிர்ப்புப் போராட்டத்தை இஸ்ரேலிய அதிகாரிகள் வன்முறை மூலம் ஒடுக்கியது தலைப்புச் செய்திகளாக வெளியானது. அதில் பல ஆர்ப்பாட்டக்கார்களுக்கு காயம் ஏற்பட்டது, அவர்களில் இஸ்ரேலிய நாடாளுமன்ற உறுப்பினர் ஓஃபர் காசிஃப்-ம் அடங்குவார். அவர் பாலஸ்தீனிய-பெரும்பான்மை கூட்டு பட்டியலைச் சேர்ந்த ஒரு யூத உறுப்பினர்.

சென்ற பிப்ரவரி மாதம், ஜெரமி கோர்பின் உள்ளிட்ட பிரிட்டிஷ் நாடாளுமன்ற உறுப்பினர்கள், ஷேக் ஜர்ரா நிலைமை பற்றிய ஒரு அவசர கடிதம் ஒன்றில் கையெழுத்திடும் வகையில் அவர்கள் மத்தியில் வெற்றிகரமாக பிரச்சாரம் செய்துள்ளார் முகமது எல்-குர்த்.

மார்ச் மாதம், 14 பாலஸ்தீனிய மற்றும் பிராந்திய மனித உரிமைகள் அமைப்புகள் கிழக்கு ஜெருசலத்தில், குறிப்பாக ஷேக் ஜர்ராவில், நடைபெறும் கட்டாய வெளியேற்றங்கள் குறித்து “ஐநா சிறப்பு வழிமுறைகள்”-க்கு ஒரு அவசர வேண்டுகோளை அனுப்பினர்.

அதில் கிழக்கு ஜெருசலேமை ஆக்கிரமிப்பதற்கு இஸ்ரேல் தனது உள்நாட்டுச் சட்டங்களை எவ்வாறு சட்ட விரோதமாக பயன்படுத்துகிறது என்றும் அதன் விளைவாக நீதிமன்ற முடிவுகள் கிட்டத்தட்ட எப்போதுமே இஸ்ரேலிய குடியேறிகள் அமைப்புகளுக்கு சாதகமாகவே உள்ளன என்றும் சுட்டிக் காட்டியிருந்தனர்.

ஷேக் ஜர்ராவைப் பற்றி செய்தி வெளியிடும் போதும், படிக்கும் போதும் சர்வதேச ஊடகங்களும், வாசகர்களும் பொதுவாக செய்யும் தவறு ஒன்றை, மாண்டோவெய்சிடம் பேசும் போது முகமது அல்-குர்து சுட்டிக் காட்டியுள்ளார். ஆக்கிரமிக்கப்பட்ட கிழக்கு ஜெருசலேமில் உள்ள பாலஸ்தீனிய சமுதாயங்கள் இஸ்ரேலிய நீதித் துறையின் அதிகாரத்துக்கு உட்பட்டவை என்று அங்கீகரிப்பதுதான் அந்தத் தவறு.

“சர்வதேச சட்டத்தின் கீழ், ஆக்கிரமிக்கப்பட்ட கிழக்கு ஜெருசலேமில் உள்ள எங்கள் மீது இஸ்ரேலிய சட்டத்துக்கு எந்த சட்ட அதிகாரமும் கிடையாது. ஆனாலும் நிலைமையை பாருங்கள்” என்கிறார் அவர். எண்ணற்ற மனித உரிமைகள் குழுக்களும் கூறியிருப்பதைத்தான் அவர் கூறுகிறார்.

“நாங்கள் குடியேறிகளை எதிர்த்து போராடிக் கொண்டிருக்கிறோம், ஆனால் நாங்கள் குடியேற்ற-காலனிய நீதிமன்றம், நீதிபதி, ஜூரிகள் ஆகியோரை எதிர்கொள்கிறோம்” என்றார் முகமது எல்-குர்த்.

தனது பிரச்சாரம் மூலம் தான் சொல்ல விரும்பும் மிகப்பெரிய செய்தி என்னவேன்றேல், ஷேக் ஜர்ராவில் நடப்பதை உயர் அரசியல் மட்டத்திலும் வெளியுறவு மட்டத்திலும்தான் எதிர்க்க முடியும் என்பதுதான் என்கிறார் முகமது எல்-குர்த்.

“எந்த ஒரு நடைமுறை நடவடிக்கையும் எடுக்காமல், இஸ்ரேலிய அதிகாரிகளுக்கு வெற்று கண்டன கடிதங்களால் எதுவும் ஆகாது என்று சோர்வடைந்துள்ளேன். உண்மையிலேயே ஷேக் ஜர்ராவை பாதுகாக்க வேண்டுமென்றால், உலக மக்கள் வலுவான அரசியல் நிலைப்பாடுகளை எடுத்து இஸ்ரேல் செய்வது தொடர்பாக அதன் மீது பொருளாதாரத் தடைகள் விதிக்க வேண்டும்” என்கிறார் அவர்.

“ஒரு கூட்டுத்துவ நகரப் பகுதி” என்ற வகையில் குடியேறி அமைப்புகளின் கட்டாய இடமாற்றம் மற்றும் உடைமை பறிப்பு மூலமாக நாங்கள் எங்கள் வீடுகளை இழக்கிறோம். அந்த அமைப்புகள் அரசுடன் கூட்டு சேர்ந்து செயல்படுகின்றன” என்கிறார் முகமது எல்-குர்த்.

ஷேக் ஜர்ராவில் நடப்பதை குறிப்பிடுவதற்கு “பிரித்து வைத்தல்” என்ற சொல் பொதுமானது இல்லை என்கிறார் முகது எல்-குர்த். இந்தப் பகுதியில் நடப்பதை “இன அழிப்பு” என்ற சொல் சரியாக குறிப்பிடுகிறது என்கிறார், அவர்.

“இது ஒரு நாக்பா, 1948-ல் நடந்தது போலவே மற்ற பகுதிகளுக்கும் சமுதாயங்களுக்கும் தொடர்ந்து நடக்கும் நாக்பா”, என்கிறார் அவர். “எங்களது நகரப் பகுதிகள் கண் முன்பே அழிவதை நாங்கள் பார்த்துக் கொண்டிருக்கிறோம்” என்கிறார் முகமது எல்-குர்த்.

அவரது மிகப்பெரிய பயங்களில் ஒன்று, 10 ஆண்டுகளுக்குப் பிறகு இந்தப் பகுதியின் வழியாக நடந்து செல்லும் போது தான் வளர்ந்த இடத்தின் எந்த ஒரு மிச்சத்தையும் பார்க்க முடியாது என்பதுதான் என்கிறார் முகமது எல்-குர்த்.

“இந்த குடியேற்ற அமைப்புகள் வெற்றி பெற்று விட்டால், இந்தப் பகுதியை கடந்து செல்லும் போது குடியேற்றங்களை மட்டும்தான் நாம் பார்க்கப் போகிறோம். ஷேக் ஜர்ராவை ஒரு பழைய நினைவாக எழுதுபவர்கள் மட்டுமே இருப்பார்கள்” என்கிறார் அவர்.

“என்ன நடந்தாலும் சரி, எங்களது நம்பிக்கைகளிலும் இந்த நிலம் எங்களுடையது என்ற வரலாற்று உண்மை மீதும் நாங்கள் 100% உறுதியாக இருக்கப் போகிறோம். எங்கள் வீடுகளிலிருந்து கட்டாயமாக இழுத்துச் செல்லப்பட்டால் ஒழிய நாங்கள் வெளியேறப் போவதில்லை என்பதை உலகத்துக்கு தெரிவிக்க விரும்புகிறேன்” என்கிறார் அவர்.

www.thewire.in இணையதளத்தில் ரம்யா படேல் எழுதியுள்ள கட்டுரையின் மொழியாக்கம்

சுதந்திர ஊடகத்தை ஆதரிக்க

உங்கள் பங்களிப்பு, அரண்செய் ஊடகத்தின் சுதந்திரத்தை உறுதி செய்கிறது. இதன் மூலம் எங்களால் தொடர்ந்து சிறந்த செய்திகளை அனைவருக்கும் வழங்க முடியும். உங்கள் பங்களிப்பு எவ்வளவு சிறிதாயினும் அல்லது பெரிதாயினும் அது எங்களின் எதிர்காலத்திற்கு மிகவும் அவசியமானது.

மற்ற சில பதிவுகள்