Aran Sei

“புலன் விசாரணையை பாதிக்கும்” – பிரேதப் பரிசோதனை அறிக்கையை தர மறுக்கும் ஜம்மு & காஷ்மீர் காவல்துறை

image credit : thewire.in

டக்கு காஷ்மீர், சோபோர் நகரில் போலீசால் கூட்டிச் செல்லப்பட்டு இறந்து விட்டதாக அறிவிக்கப்பட்ட 23 வயதான இர்ஃபான் அகமது தர் என்பவருடைய சவப்பரிசோதனை அறிக்கையை அவரது குடும்பத்தினருக்கு தர ஜம்மு காஷ்மீர் போலீஸ் மறுத்துவிட்டது. அவ்வாறு தருவது இந்த வழக்கில் புலனாய்வுக்கு தடையாக இருக்கும் என்கிறது போலீஸ்.

போலீஸ் காவலில் அவரை கொன்று விட்டதாக இர்ஃபான் குடும்பத்தினர் குற்றம் சாட்டிய நிலையில் அவரது மரணம் நகரில் போராட்டங்களை தூண்டியது. எனினும், போலீஸ் அவரை போராளிகளின் “இரகசிய ஊழியர்” என்றும் தங்கள் காவலில் இருந்து அவர் தப்பிவிட்ட பிறகே அவரது உடல் கண்டெடுக்கப்பட்டதாகவும் கூறுகிறது.

அறிக்கையை வெளியிடுவது புலன் விசாரணையை பாதிக்கும்

சோபோர் போலீஸ் மாவட்டத்தால் தகவல் அறியும் உரிமை சட்டத்தின் கீழ் பொது தகவல் அதிகாரி என அறிவிக்கப்பட்டுள்ள போலீஸ் அதிகாரி, கொல்லப்பட்டவரின் பிரேத பரிசோதனை அறிக்கையை வெளியிடுவது இந்த வழக்கின் புலனாய்வுக்கு இடையூறு ஏற்படுத்தி விடும் என்பதால் அந்த அறிக்கையை தரமுடியாது எனக் கூறியுள்ளார்.

“8/2/2021 தேதியிட்ட உங்கள் விண்ணப்பத்தில், இறந்துபோன சோபோர் சித்திக் காலனியில் வசிக்கும் முகமது அக்பரின் மகன் இர்ஃபான் அகமது தர் என்பவரின் சவப்பரிசோதனை அறிக்கையை கேட்டுள்ளீர்கள். உங்கள் விண்ணப்பத்தை பரிசீலித்ததில் அந்தத் தகவலை வெளியிடுவது புலனாய்வுக்கு தடையாக இருக்கும் என்று நான் கருதுகிறேன். ஆகவே, சட்டத்தின் பிரிவு 8(ஏ) வின் படி நீங்கள் கேட்ட தகவலை தர மறுக்கிறேன்,” என்று தகவல் அறியும் உரிமைச் சட்டத்தின் கீழ் இறந்தவரின் சகோதரர் ஜாவேத் அக்பர் தர் என்பவர் பதிவு செய்துள்ள விண்ண்ணப்பத்திற்கு அளித்துள்ள பதிலில் அந்த அதிகாரி கூறி உள்ளார்.

“இதை எதிர்த்து நீங்கள் முதல் மேல்முறையீட்டு அதிகாரிக்கு அதாவது சோபோர் மூத்த போலீஸ் கண்காணிப்பாளரிடம் மேல் முறையீடு செய்யலாம்,” என்றும் அந்த பதில் கூறுகிறது.

தனது சகோதரனை கொலை செய்து விட்டதை மூடி மறைப்பதற்காக அவர்கள் கூறி வரும் பொய்கள் அம்பலமாகிவிடும் என்பதாலேயே அதிகாரிகள் அந்த அறிக்கையைத் தர மறுக்கிறார்கள் என்கிறார் ஜாவேத்.

“விசாரணை அறிக்கையையும் அதே போல் சவப் பரிசோதனை அறிக்கையையும் ஏன் அவர்கள் வெளியிட மறுக்கிறார்கள்? ஏன் உண்மையை மறைக்கிறார்கள்? அவர்களுடைய குற்றம் வெளியாகிவிடும் என்பதால் அவர்கள் இந்த அறிக்கைகளை வெளியிட மாட்டார்கள் என்று எனக்குத் தெரியும்,” என்கிறார் அவர்.

குடும்பத்தினருக்கு பிரேத பரிசோதனை அறிக்கையை தர அதிகாரிகள் மறுக்க முடியாது எனக் கூறுகிறார் அவர்களுடைய வழக்கறிஞர் சஃப்கத் நாசிர். “2005-ம் ஆண்டின் தகவல் அறியும் உரிமைச் சட்டத்தின் பிரிவு 8-ன் படி சவப்பரிசோதனை அறிக்கையின் நகலை இறந்தவரின் குடும்பத்திற்கு தர மறுக்க முடியாது. எனவே தகவல் தர மறுத்து விட்டதை எதிர்த்து நாங்கள் மேல் முறையீட்டு அதிகாரியிடம் மேல் முறையீடு செய்வோம்,” என்கிறார் அவர்.

2011-ல், தகவல் அறியும் உரிமைச் சட்டத்தின் கீழ், ஒரு சவப்பரிசோதனை அறிக்கையை பெறுவதை மறுக்க முடியாது என மத்திய தகவல் ஆணையம் கூறி உள்ளது.

“சவப்பரிசோதனை அறிக்கை என்பது ஒரு இறந்த உடலின் தடயவியல் பகுப்பாய்வின் அடிப்படையில் தயாரிக்கப்படும் ஒரு உண்மைகள் அடங்கிய அறிக்கை. உண்மைகள் அடங்கிய அறிக்கையாக மட்டுமே என்பதால் சவப்பரிசோதனை அறிக்கை புலன் விசாரணைக்குத் தடையாக இருக்கும் என வாதிட இயலாது. புலனாய்வும் அதைத் தொடர்ந்து வழக்கு பதிவும் சவப்பரிசோதனையின் போது கண்டுபிடிக்கப்பட்ட உண்மைகளின் அடிப்படையிலேயே நடைபெற வேண்டும். இதன் அடிப்படையில், சவப்பரிசோதனை அறிக்கை தகவல் அறியும் உரிமைச் சட்டத்தின் பிரிவு 8 (ஏ)-ன் கீழ் வருவது என்ற வாதத்தை மத்திய தகவல் ஆணையம் ஏற்றுக் கொள்ளவில்லை,” என தகவல் ஆணையர் சைலேஷ் காந்தியின் ஆணை கூறுகிறது.

தகவல் அறியும் உரிமைச் சட்டத்தின் பிரிவு 8 ( ஏ), “புலனாய்வுக்கு அல்லது குற்றவாளியை பிடிப்பதற்கு அல்லது வழக்கு பதிவதற்கு தடையாக இருக்கும் தகவல்களுக்கு” விலக்கு அளிக்கிறது.

இறப்பும், போலீசின் தரப்பும்

கடந்த ஆண்டு செப்டம்பர் மாதம் 15-ம் தேதி மதியம் 12:30 மணிக்கு ஜம்மு காஷ்மீரின் போலீசின் சிறப்பு நடவடிக்கைக் குழுவினர் சோபோர் நகரில் சித்திக் காலனியில் வசிக்கும் ஒரு 23 வயதான கடைக்காரரின் வீட்டில் சோதனையிட்டனர்.

வீட்டிற்கு அருகில் உள்ள அவரது கடையிலிருந்து இர்ஃபான் கைது செய்யப்பட்டார்.

மாலை 3:30 மணிக்கு அந்த வீட்டை சிறப்பு நடவடிக்கைக் குழுவினர் மீண்டும் சோதனையிட்டனர். இம்முறை 30 வயதான அவரது சகோதரர் ஜாவிதை கைது செய்து டவுன் ஹாலில் உள்ள தங்கள் முகாமிற்கு அழைத்துச் சென்றனர். ஜாவித் அன்று இரவே விடுதலை செய்யப்பட்டு விட்டார். ஆனால், மறுநாள் காலை (செப் 16) இர்ஃபான் இறந்து விட்டார் செய்தி அந்தக் குடும்பத்துக்கு தெரிய வந்தது.

இர்ஃபான் போராளிகளின் ரகசிய ஊழியர் என்றும், “மேலும் சிலவற்றை கைப்பற்றுவதற்காக” அவரை ஒரு இடத்துக்கு அழைத்துச் சென்ற போது, ‘இருட்டையும், நிலப்பரப்பையும் பயன்படுத்தித் தப்பிச் சென்ற’ பிறகு அவரது உடலை கண்டெடுத்ததாகவும் போலீஸ் கூறுகிறது.

போலீஸ் வெளியிட்டுள்ள அறிக்கையின்படி, இர்ஃபான் செப்டம்பர் 15-ம் தேதி கைது செய்யப்பட்டார். அவரிடமிருந்து இரண்டு கையெறி குண்டுகள் கைப்பற்றப்பட்டன.

“விசாரணையின் போது, இரகசிய ஊழியர் கொடுத்த தகவல்களின் அடிப்படையில் மேலும் சில பொருட்களை கைப்பற்றுவதற்காக அவருடன் போலீஸ் குழு துஜார்-ஷாரீப் கிராமத்தின் சேர்தாசி பகுதிக்குச் சென்றது. இதற்கிடையில் அவர் இருட்டையும், நிலப்பரப்பையும் பயன்படுத்தி தப்பித்துச் சென்று விட்டார்… அதைத் தொடர்ந்து நடத்தப்பட்ட தேடுதல் நடவடிக்கையின் போது துஜார்-ஷரீப் கிராமத்தின் ஒரு கல்குவாரிக்கு அருகே அவரது உடல் கண்டெடுக்கப்பட்டது.” என்று போலீஸ் கூறியது.

போலீசின் இந்தக் கூற்றை மறுத்த அந்தக் குடும்பத்தினர், போலீஸ் காவலில் தான் இர்ஃபான் கொல்லப்பட்டுள்ளார் என்றும் அவருக்கும் தீவிரவாதத்திற்கும் தொடர்பில்லை என்றும் கூறுகின்றனர்.

சவப்பரிசோதனை ஸ்ரீ நகர் காவல்துறை மருத்துவமனையில் நடைபெற்றது. உடல் அவர்களது வீட்டிலிருந்து நூறு கி. மீ. தள்ளி உள்ள கந்தர்பாலில் உள்ள சோன்மார்கில் அடக்கம் செய்யப்பட்டது.

கொரோனா நோய்த்தொற்று பரவ ஆரம்பித்த பிறகு, ஜம்மு காஷ்மீர் அதிகாரிகள் துப்பாக்கிச் சூட்டில் இறந்த போராளிகளின் உடல்களை கந்தர்பால் மாவட்டத்தில் உள்ள சோன்மார்கிலோ அல்லது பாராமுல்லாவில் உள்ள கன்டாமுலாவிலோ சத்தமின்றி அடக்கம் செய்து வருகின்றனர்.

உயர்நீதிமன்றத்தை அணுகியிருக்கும் குடும்பத்தினர்

நீதித்துறை விசாரணை அறிக்கையின் நகலை தரக் கோரியும், போலீஸ் காவலில் நடந்ததாகக் கூறப்படும் இறப்பு தொடர்பாக முதல் தகவல் அறிக்கை பதிவு செய்ய வேண்டும் என்று கோரியும் உயர்நீதிமன்றத்தில் மனு செய்துள்ளனர் அந்தக் குடும்பத்தினர்.

அந்த மனுவில் மாவட்ட நீதிபதியின் உத்தரவின் பேரில் பாராமுல்லாவின் கூடுதல் துணை ஆணையர் நடத்திய நீதித்துறை விசாரணை அறிக்கையின் நகல் தங்களுக்கு வேண்டும் என கூறி உள்ளனர்.

போலீஸ் காவலில் அவர் கொல்லப்பட்டுள்ளார் என இறந்தவரின் குடும்பம் கூறியதை அடுத்து பாராமுல்லா மாவட்ட நீதிபதி ஒரு விசாரணைக்கு உத்தரவிட்டுள்ளார்.

இர்ஃபானின் மரணம் மிகவும் “சந்தேகத்திற்குரிய வகையில்” நடந்துள்ளது என்றும் “அவரது தலை, மார்பு, கை கால்கள் உள்ளிட்ட உடலின் அனைத்து பாகங்களிலும் சித்ரவதைக்கான அடையாளங்களாக காயங்கள் வெளிப்படையாக இருந்தன. கண்ணுக்குப் புலப்படும் வகையில் தீப்புண் காயங்கள் இறந்தவரின் உடலில் இருந்தன.”

“இவை யாவும் இறந்தவர் போலீஸ் காவலில் இறக்கும் அளவுக்கு சித்திரவதை செய்யப்பட்டுள்ளார் எனவும், அதனை சரிகட்ட, மேலும் சிலவற்றைக் கைப்பற்றச் சென்ற போது இறந்தவர் காவலில் இருந்து தப்பித்து ஓடி விட்டார் போன்ற கதைகள் புனையப்பட்டுள்ளன எனவும் ஆகிய (மனுதாரர்களின்) நம்பிக்கையை வலுப்படுத்துகிறது,” என மனுவில் கூறப்பட்டுள்ளது.

விசாரணை அதிகாரி, இர்ஃபானை கொலை செய்ததற்கு பொறுப்பான போலீஸ் அதிகாரிகளை அதிகார பூர்வமாக குற்றம் சாட்டியுள்ளார் என்று அந்த மனுவில் இர்ஃபானின் குடும்பத்தினர் கூறி உள்ளனர்.

“விசாரணை அதிகாரியின் முன் கூறப்பட்ட சாட்சியங்களின் படி, விசாரணை அறிக்கை காவலில் கொலை செய்த போலீசாரை குற்றம் சாட்டியுள்ளது என்றும் அவர் காவலிலிருந்து தப்பி ஓடும்போது கல்குவாரியில் விழுந்து இறந்து விட்டதாகக் கூறும் காவல்துறையின் சித்தரிப்பை அது நிராகரிக்கிறது என்றும் நாங்கள் தர்க்கரீதியாக கருதுகிறோம்” என்று மனுவில் கூறப்பட்டுள்ளது.

www.thewire.in இணைய தளத்தில் உமர்மக்பூல் எழுதியுள்ள கட்டுரையின் மொழியாக்கம்

சுதந்திர ஊடகத்தை ஆதரிக்க

உங்கள் பங்களிப்பு, அரண்செய் ஊடகத்தின் சுதந்திரத்தை உறுதி செய்கிறது. இதன் மூலம் எங்களால் தொடர்ந்து சிறந்த செய்திகளை அனைவருக்கும் வழங்க முடியும். உங்கள் பங்களிப்பு எவ்வளவு சிறிதாயினும் அல்லது பெரிதாயினும் அது எங்களின் எதிர்காலத்திற்கு மிகவும் அவசியமானது.

மற்ற சில பதிவுகள்