Aran Sei

புதிய தொழிலாளர் நலச் சட்டங்கள்: சீர்த்திருத்தமா? சீர்கேடா? – விரிவான அலசல்

டைமுறையில் உள்ள 29 தொழிலாளர் சட்டங்களுக்குப் பதிலாக 2018 முதல் 2020 வரை, நான்கு வரைவுக் குறியீடுகளை (Draft codes) மத்திய தொழிலாளர் மற்றும் வேலைவாய்ப்பு அமைச்சகம் உருவாக்கி உள்ளது. நீண்ட காலமாக நிலுவையிலிருந்த இந்த வேலை, இரண்டாவது தொழிலாளர் ஆணையத்தின்(1999-2002) பரிந்துரைகளின் ஒருங்கிணைப்புடன் நடந்துள்ளது. ஆணையம், நடப்பில் உள்ள தொழிலாளர் சட்டங்கள் பழைமையான விதிகள் மற்றும் சட்டங்கள் முழுவதும் சீரற்ற வரையறைகளுடன் சிக்கலானதாக இருப்பதாகக் கண்டறிந்துள்ளது.

ஆணையம்,  இணக்கத்தை மேம்படுத்துவதற்கும், தளர்த்து வதற்கும் மற்றும் இருக்கும் தொழிலாளர் சட்டங்களில் ஒரு சீரான தன்மையை உறுதி செய்வதற்கும் பரிந்துரைகளை செய்தது‌. இந்த சட்டங்கள், வளர்ந்து வரும் உழைப்பு வடிவங்களை அல்லது 90 விழுக்காட்டிற்கும்  அதிகமாக உள்ள இந்தியாவின் முறைசாரா அல்லது அமைப்புசாரா தொழிலாளர்களை, போதுமான அளவு அங்கீகரிக்கவும் இல்லை, அவர்களுக்கு எதுவும் வழங்கவும் இல்லை.

அண்மையில், தொற்று நோயால் அறிவிக்கப்பட்ட முழு முடக்கம் காரணமாக, லட்சக்கணக்கான தொழிலாளர்கள் பல்லாயிரம் மைல்கள் நடந்தே தங்கள் சொந்த ஊருக்குத் திரும்பிய அந்த நெருக்கடியான நேரத்தில் கூட, அவர்களுக்கு ஓரளவு பாதுகாப்பாவது வழங்குவதற்கான கொள்கைகள் முற்றிலும் இல்லாதது தெரியவந்தது.

ஏற்கெனவே உள்ள 29 சட்டங்களை, நாடாளுமன்றத்தில் தாக்கல் செய்யப்பட்டுள்ள நான்கு தொழிலாளர் குறியீடுகள் மாற்றி உள்ளன. பாராளுமன்றத்தில் அவை நிறைவேற்றப்பட்ட பாதையை பார்க்கும் போது, முதலில் நான்கு குறியீடுகளும் நாடாளுமன்றத்தில் வைக்கப்பட்டு பின்னர் தொழிலாளர் தொடர்பான  நாடாளுமன்ற நிலைக்குழுவிற்கு பரிந்துரைக்கப்பட்டன. ஊதியம் பற்றிய குறியீடு 2019ல் நாடாளுமன்றத்தில் நிறைவேற்றப்பட்ட நிலையில், தொழிற்சாலை உறவுகள் சட்டம், சமூகப் பாதுகாப்புக் குறியீடு மற்றும் தொழில் பாதுகாப்பு, சுகாதாரம், பணி நிலைமைகள் குறித்த குறியீடு மீண்டும் நாடாளுமன்றத்தில் செப். 2020 ல் வைக்கப்பட்டு, ஒருசில நாட்களில் நிறைவேற்றப்பட்டன.

குறியீடுகளின் பகுப்பாய்வுகள், அவைகளின் முந்தைய மறு செய்கை, நிலைக்குழுவின் அறிக்கைகள், ஒட்டு மொத்தமாக இந்த நான்கு குறியீடுகளிலும் செய்யப்பட்டுள்ள விதிகள் ஆகியவை, அவை உள்ளடக்கிய முந்தைய சட்டங்களை ஒப்பிடும் போது, தொழிலாளர்களின் நிலையை ஒருமனதாக வலுவிழக்கச் செய்வதாக உள்ளன.  இந்தியாவின் கார்பரேட்டுகள் இதற்கு பெரும் வரவேற்பு தெரிவித்திருப்பதே இந்த மதிப்பீட்டை ஆதரிப்பதாக தெரிகிறது.

முரண்பாடான பிரிவுகள்

இந்த சட்டங்களில் உள்ள குறிப்பிட்ட சில பிரிவுகள், குறியீடு உள்ளிட்ட பிற சட்டங்களில் உள்ள பிரிவுகளுடன் ஒத்து போகவில்லை அல்லது நேரடியாக முரண்பாடாக உள்ளன. எடுத்துக்காட்டாக:

அ) முறைசாரா துறை தொழிலாளர்களின் ஊதியம் பற்றி, இதில் பேசப்படவே இல்லை. குறைந்தபட்ச ஊதியம் குறித்த கணக்கீட்டு சூத்திரம் நம்ப முடியாத அளவிற்கு காலாவதியானது என்பதுடன் பல காரணிகளை கணக்கில் எடுத்துக் கொள்ளவே இல்லை.

ஆ) கிக்(gig) தொழிலாளர்கள் எனப்படும் வீட்டு வேலை செய்பவர்கள், நடைபாதை வேலை செய்பவர்கள், (platform workers) போன்றவர்களின்  சமூகப் பாதுகாப்பு பற்றிக் கூறும் சமூகப் பாதுகாப்புக் குறியீடு, குறிப்பிட்ட சுரங்கங்களில் வேலை செய்யும் தொழிலாளர்கள், ஆஷா (ASHA) எனப்படும் அங்கீகரிக்கப்பட்ட சமூக சுகாதார செயற்பாட்டாளர்கள் மற்றும் அங்கன்வாடி தொழிலாளிகள் மற்றும் நீடித்த தொழிலாளிகளை அதில் உள்ளடக்கவில்லை‌. பணி நீக்கம் செய்யப்பட்ட, ஆட்குறைப்பால் பாதிக்கப்பட்ட, வேலையில்லாத தொழிலாளர்களுக்கான எந்த திட்டமும் இதில் இல்லை. மேலும், இந்த குறியீடு, தொழில்சார் நோய்களைப் பற்றிக் குறிப்பிடும் போது அந்த அட்டவணையில் உள்ள நோய்கள், தொழில்சார் பாதுகாப்பு, சுகாதாரம் மற்றும் பணி நிலைமைகள் (OSHWC ) விதிகளில் உள்ள தொழில்சார் நோய்களின் பட்டியலிருந்து வேறுபட்டுள்ளது.

இ) இந்த OSHWC குறியீட்டில், வீட்டு வேலைகள், முறைசாரா துறை, பருவகால அல்லது குடும்ப இடம் பெயர்வு மற்றும் குறிப்பாக பெண் தொழிலாளர்களுக்கு எதிரான உடல்/ பாலியல் வன்முறைகளுக்கு எதிராக எந்தப் பாதுகாப்பும் இல்லை. அபாயகரமான அல்லது நச்சு பொருட்கள்/நடைமுறைகள் உள்ள இடங்களில் இளம்பருவத்தினர் வேலை செய்ய இது அனுமதிக்கிறது. கடன்மீட்பு விஷயத்திலும் ஒரு நேரடி முரண்பாடு இருப்பதாகத் தோன்றுகிறது: ஒரு புலம் பெயர்ந்த தொழிலாளரின் கடன், வேலை வாய்ப்பு முடிந்த உடன் அழிந்து போவதாகக் குறியீடு கூறுகிறது. ஆனால் ஊதியக் குறியீடோ எந்த ஒரு முன்பணமும் முதல் ஊதியத்திலிருந்தே வர வேண்டும் என்று கூறுகிறது.

ஈ) தொழிற்சாலை உறவுகள் குறியீடு, தொழிலாளர்களை வலுவிழக்கச் செய்யும் அதே வேளையில் வணிகங்களுக்குச் சாதகமாக உள்ளது. எடுத்துக்காட்டாக, தொழிலாளர்கள் வேலைநிறுத்தம் குறித்து 15 நாட்களுக்கு முன்பே எச்சரிக்கைச் செய்ய வேண்டும் என்றும் வேலை நிறுத்தம் 60 நாட்களுக்கு மேல் நீடிக்கக் கூடாது என்றும் கூறுகிறது. ஒரே நேரத்தில் 300 தொழிலாளர்களை பணி நீக்கம் செய்வதற்கும் அல்லது ஆட்குறைப்பு செய்வதற்கும் முதலாளிகளுக்கு அதிகாரம் அளிக்கிறது.

உ) மாநிலங்களுக்கு இடையே புலம் பெயர்ந்த தொழிலாளர்கள் பற்றி குறியீடுகள் ஊமையாக இருப்பதுடன்,  அவர்களுக்கு குறிப்பிட்ட ஏற்பாடுகள், உரிமைகள் மற்றும் பாதுகாப்பு பற்றி வாயே திறக்கவில்லை.

மாநிலங்களுக் கிடையிலான புலம் பெயர்ந்த தொழிலாளர்கள் சட்டத்திற்கு (1979) பதில் கொண்டு வரப்பட்டுள்ள OSHWC குறியீடு, தொழிலாளர்களுக்கான வங்கி கணக்குப் புத்தகம் போன்ற முந்தைய சட்டத்தில் இருந்த அடிப்படை பாதுகாப்பைக் கூட தரவில்லை. தற்போது அவர்கள் ‘ஒப்பந்தத் தொழிலாளர்கள்’ என்று வகைப்படுத்தப்பட்டுள்ளனர். இதனால், அவர்களுக்கே உரிய, புலம்பெயர்தலின் ஒட்டு மொத்த நடைமுறை, கடத்தல் மற்றும்/ அல்லது சுரண்டலுக்கு எதிராக பாதுகாப்புக்கான உறுதி, போன்ற  தனிப்பட்ட கவலைகள் மற்றும் சிக்கல்களை கணக்கில் எடுத்துக் கொள்ளவே இல்லை.

முறைசாரா தொழிலாளிகள் அல்லது புலம் பெயர்ந்த தொழிலாளர்களுக்கான குறிப்பான சமூகப் பாதுகாப்பு திட்டம் கூட தரப்படவில்லை. பெரிதாக கூறவேண்டுமெனில், இந்த குறியீடுகளின் கீழ் எந்த தொழிலாளர்களுக்கும் நெருக்கடி கால ஏற்பாடுகள் எதுவும் இல்லை.

OSHWC குறியீடு, கொத்தடிமைத் தொழிலாளர் சட்டம், குழந்தைகள் மற்றும் இளம்பருவத்தினர் தொழிலாளர் சட்டம்

எந்த தொழிலாளர் குறியீடும், இருக்கும் சட்டங்களும் எந்த முன்னோக்கிய இணைப்பையும் தரவில்லை. மிகவும் சுரண்டலுக்கு உள்ளாகும் கொத்தடிமைத் தொழிலாளர்கள், குழந்தைகள் மற்றும் இளம்பருவத்தினர் போன்ற சில குழுக்களின் உரிமைகள் மற்றும் பாதுகாப்புப் பற்றி ஏறெடுத்தும் பார்க்கவில்லை.

ஒரு பகுப்பாய்வு,  OSHWC குறியீட்டிற்கும் கொத்தடிமைத் தொழிலாளர்கள் சட்டத்திற்கும், அதேபோல OSHWC க்கும் குழந்தைகள், இளம் பருவத் தொழிலாளர் சட்டத்திற்கும் இடையே நிறைய முரண்பாடுகளும், இடைவெளிகளும் கூட இருப்பதாக கண்டறிந்துள்ளது. கொத்தடிமை அல்லது குழந்தை/இளம்பருவத் தொழிலாளர்கள் நிகழ்வுகள் என்பதை உறுதி செய்ய பல சட்டங்களும் நடைமுறைகளும் மாநிலங்களில் இருந்தாலும், ஆயிரக்கணக்கில் அத்தகையத் தொழிலாளர்கள், பெரும்பாலும் முறைசாரா துறையில்,  அத்தகைய சூழலில் சிக்கி இருக்கிறார்கள்.

OSHWC குறியீடு 1976 ம் ஆண்டு கொத்தடிமைகள் தொழிலாளர் ஒழிப்பு சட்டத்துடன் நேரடியாக தொடர்பு படுத்தப்படவில்லை. இருப்பினும் ஒப்பந்தத் தொழிலாளர்களும், புலம்பெயர்ந்த தொழிலாளர்களும் அந்த சட்டத்தின் கீழ் உள்ளனர்.

மேலும், இந்த இரண்டு பிரிவினருக்கான குறிப்பிட்ட சட்டங்களான 1970 ஆம் ஆண்டு ஒப்பந்தத் தொழிலாளர்கள் ( ஒழுங்குபடுத்தும் மற்றும் ஒழிப்பு) சட்டம் , மாநிலங்களுக்கிடையிலான புலம்பெயர் தொழிலாளர்கள் (வேலை வாய்ப்பு மற்றும் பணி நிலைமைகள் ஒழுங்குபடுத்துதல்) சட்டம் (1979) ஆகியவற்றிற்குப் பதிலாக  OSHWC குறியீடு கொண்டு வரப்பட்டுள்ளது. இது சட்டங்களுக்கிடையே மோதலை உருவாக்கும் என்ற கவலையை தோற்றுவிக்கிறது. பொறுப்பை நிர்ணயித்தல், கொத்தடிமைகள் தொழிலாளர் பற்றிய கண்காணிப்பு மற்றும் காவல்துறை நடவடிக்கைக்கான அனுமதி ஆகியவை இதில் குறிப்பிடத்தக்கவை.

தவறு செய்பவர்கள்/ தண்டனைப் பெற்ற குற்றவாளிகள் பற்றிய தரவுதளங்களைப் பராமரிப்பதற்கான ஏற்பாடுகள் எந்த சட்டத்திலும் இல்லை. நியமிக்கப்பட்ட அதிகாரிகளால் பணயிடங்களை  தொடர்ந்து கண்காணிப்பது குறித்தும் இவை மௌனம் சாதிக்கின்றன. தலித்- பகுஜன்- ஆதிவாசி தொழிலாளர்கள் மற்றும் விளிம்புநிலை சமூகத்தினருக்கான உரிமைகள் மற்றும் பாதுகாப்பிற்கான ஏற்பாட்டில் மிகப் பெரிய கவலை தரும் பற்றாக்குறையும் இருக்கிறது. அதனால் உடல் அல்லது பாலியல் தாக்குதலுக்கு/ மீறல்கள் ஏற்பட்டால் அதற்கான இழப்பீடு குறித்தும் தெரிவிக்கப்படவில்லை.

OSHWC குறியீடு, 1986 ஆம் ஆண்டின், குழந்தைகள் மற்றும் வயது வந்த தொழிலாளர்கள் (தடை மற்றும் ஒழுங்கு) சட்டத்துடனான தொடர்புக்கு வெகு தொலைவில் உள்ளது. இரண்டு சட்டங்களும் 14 வயதை குறைந்தபட்ச வயதாக அங்கீகரிக்கின்றன. அதன்படி 14 வயதிற்குட்பட்டோர் குழந்தைகள் என்றும் 14 வயதிற்கு மேல் (ஆனால் 18 வயதிற்கு கீழ்) உள்ளவர்களை இளம்பருவ தொழிலாளர்கள் என்றும் கூறுகிறது. எந்த தொழிலிலும் அல்லது செயலிலும் குழந்தைகளை ஈடுபடுத்துவது தடை செய்யப்பட்டுள்ளது.  முதலாளிகள் தங்கள் ஊழியர்கள் குழந்தைத் தொழிலாளர்கள் அல்ல என்பதற்கான ஆதாரங்களை வைத்திருக்க வேண்டிய பொறுப்புடையவர்கள் என்கிறது அந்தச் சட்டம். இரு சட்டங்களும் குழந்தைகள் மற்றும் இளம்பருவத்தினர்  வேலை வாய்ப்பு தடை செய்யப்பட்ட பணியிடங்களைத்  தொடர்ந்து ஆய்வு செய்யும் அதிகாரத்தை அதிகாரிகளுக்கு  அளிக்கின்றன.

எனினும் இரு சட்டங்களுக்கும் இடையே முரண்களும் உள்ளன: குழந்தை தொழிலாளர் தடைச் சட்டம் அபாயகரமான தொழில்களில் வயது வந்தோரை ஈடுபடுத்துவதை தடை செய்கிறது. ஆனால் OSHWC குறியீடு 16 மற்றும் அதற்கு மேற்பட்ட வயதினரை சுரங்கங்களில் பயிற்சி பெற அனுமதிக்கிறது. முந்தைய சட்டங்கள் குழந்தைகள் மற்றும் இளம்பருவத்தினரை பணியில் ஈடுபடுத்தும் பெற்றோர்களுக்கு அபராதம் விதிக்கும், அதே வேளையில் OSHWC முதலாளிகளுக்கு மட்டுமே அபராதம் விதிக்கிறது. அபாயகரமான செயல்முறை அட்டவணைகள் இரு சட்டங்களிலும் வேறுபடுகின்றன.

இரு சட்டங்களின் பகுப்பாய்வும் இளம்பருவத்தினர், புலம் பெயர் தொழிலாளர்களுக்கு பாதுகாப்பு ஏற்பாடுகளில் மிகப்பெரிய இடைவெளி இருப்பதை வெளிப்படுத்துகிறது‌‌. அவர்கள் இன்னும் ஓரளவு வயதானவர்களின் மேற்பார்வையில் இருக்க வேண்டிய தேவை இருப்பதால், பெற்றோர்கள் வேலைக்காக இடம் பெயரும் போது, அவர்கள் எல்லையில்லாத பாதிப்பிற்கு உட்படுத்தப்படுகிறார்கள். பிறந்த இடத்திலோ அல்லது பெற்றோர்கள் புலம்பெயர்ந்து வேலை செய்யும் இடங்களிலோ இவர்களுக்கு மேற்படிப்பு அல்லது உறைவிடம் பற்றி எந்த சட்டமும் கவனம் கொள்ளவில்லை. மேலும் குழந்தை தொழிலாளர் சட்டம் இளம் பருவத்தினரை குடும்ப நிறுவனங்களில் நிபந்தனைகளுடன் பணியாற்ற அனுமதிக்கிறது என்றாலும், அத்தகைய தொழில்களில் அவர்களின் பாதுகாப்பிற்கான விதிமுறைகள் எதுவும் இல்லை.

OSHWC குறியீடு முறைசாரா துறை அல்லது குடும்ப வணிகங்களை உள்ளடக்கவில்லை. OSHWC குறியீடு, நாடாளுமன்ற நிலைக்குழுவின்  பரிந்துரைகளைப் புறக்கணித்து விட்டதுடன், இந்த தொழிலாளர் குழுக்களின் கடத்தல் அல்லது சுரண்டலுக்கு எதிரான பாதுகாப்பு குறித்து அமைதிகாக்கிறது. கொத்தடிமை/ ஒப்பந்தத் தொழிலாளர்கள் குழந்தைகள், இளம் பருவத்தினர், புலம்பெயர்ந்தவர்கள்  ஆகியோர் இந்த சட்டங்களால் தொடர்ந்து  மிக மோசமான பாதிப்பிலேயே வீழ்ந்திருக்க விடப்பட்டுள்ளார்கள்.  விதிகள், திட்டங்கள் போன்றவற்றை வடிவமைக்க வேண்டிய மிகப் பெரும் பொறுப்பு அரசுகளுக்கு உள்ளது. எனவே இந்த இடைவெளிகளை குறைக்க மாநிலங்களிலிருந்து சில மாதிரி விதிகள் வரலாம்.

(www.thequint.com இணையதளத்தில் பாம்பி பானர்ஜி மற்றும் மிஷ்டி வர்மா எழுதியுள்ள கட்டுரையின் மொழியாக்கம்)

சுதந்திர ஊடகத்தை ஆதரிக்க

உங்கள் பங்களிப்பு, அரண்செய் ஊடகத்தின் சுதந்திரத்தை உறுதி செய்கிறது. இதன் மூலம் எங்களால் தொடர்ந்து சிறந்த செய்திகளை அனைவருக்கும் வழங்க முடியும். உங்கள் பங்களிப்பு எவ்வளவு சிறிதாயினும் அல்லது பெரிதாயினும் அது எங்களின் எதிர்காலத்திற்கு மிகவும் அவசியமானது.

மற்ற சில பதிவுகள்