Aran Sei

’மாவோயிஸ்ட்’ வழக்கில் ஜாமீன். போராடுவது தேச துரோகமாகாது – கேரள நீதிமன்றம்

த்து மாதங்களுக்கு முன் கேரள காவல்துறையால் கைது செய்யப்பட்டு தேசிய புலனாய்வு முகமையில் ஒப்படைக்கப்பட்ட இரண்டு மாணவர்களுக்கு, கொச்சி தேசிய புலனாய்வு சிறப்பு நீதிமன்றம் ஜாமீன் வழங்கி உத்தரவிட்டுள்ளது. மாவோயிச புத்தகங்கள் வைத்திருப்பது, அரசுக்கு எதிரான போராட்டங்களில் பங்குகொள்வது, வலுவான அரசியல் நம்பிக்கைகள் கொண்டிருப்பது ஆகியவற்றால் மட்டுமே ஒரு நபர் பயங்கரவாத நடவடிக்கைக்கு உடந்தையாக இருந்தது ஆகாது என நீதிமன்றம் தெரிவித்துள்ளது.

தடை செய்யப்பட்ட மாவோயிஸ்ட் கட்சியுடன் தொடர்பில் இருப்பதாக ஆலன் சுவைப், தாஹா ஃபசல் ஆகிய இருவர் மீது தேசிய புலனாய்வு முகமை மற்றும் கேரள காவல்துறை சட்டவிரோத செயல்பாடுகள் தடுப்புச் சட்டத்தின் (1967) கீழ் வழக்கு பதிவு செய்திருந்தன. தற்போது அவர்களுக்கு ஜாமீன் வழங்கப்பட்டுள்ளது.

மாவோயிஸ்ட் அமைப்புடனான மாணவர்களின் தொடர்பினை சரியான ஆதாரங்களுடன் அரசு தரப்பு நிரூபிக்கவில்லை என நீதிமன்றம் கூறியுள்ளது.

”வழக்கின் தரவுகள் மற்றும் சூழ்நிலையைக் கருத்தில் கொண்டு, கடுமையாக்கும் சூழல்களையும் தணிக்கும் சூழல்களையும் சீர்தூக்கி, போட்டியிடும் எதிரெதிர் நலன்களையும் கருத்தில் கொண்டு பார்க்கையில் இந்த நீதிமன்றத்துக்கு இருக்கும் சட்டரீதியான முடிவெடுக்கும் உரிமையைப் பயன்படுத்தி மனுதாரர்களான குற்றம் சாட்டப்பட்டவர்களுக்கு ஜாமீன் வழங்குவது அவசியம் என்று நான் கருதுகிறேன். நியாயமான வழக்கு விசாரணையை உறுதி செய்யவும், அரசுத் தரப்பின் சட்டப்படியான நலன்களை பாதுகாக்கவும் தேவையான நிபந்தனைகளுக்கு உட்பட்டு இந்த ஜாமீன் வழங்கப்படுகிறது” என்று நீதிபதி அனில் கே பாஸ்கர் தன்னுடைய உத்தரவில் கூறியுள்ளார்.

பந்தீரன்காவு மாவோயிஸ்ட் வழக்கு

சட்டம் பயின்று வந்த சுவைப்  (19) மற்றும் ஊடகவியல் மாணவரான ஃபசல், கடந்தாண்டு நவம்பர் மாதம் கோழிக்கோட்டில் கேரள காவல்துறையினரால் கைது செய்யப்பட்டதை அடுத்து பந்தீரன்காவு மாவோயிஸ்ட் வழக்கு என பரவலாக கூறப்பட்டு வரும் இந்த வழக்கு முக்கியத்துவமடைந்தது. குற்றம் சாட்டப்பட்டவர்கள் மாநில ஆளுங்கட்சியான மார்க்சிஸ்ட் கம்யூனிஸ்ட் கட்சியுடன் தொடர்புடையவர்கள்.

கேரளாவில் மாவோயிஸ்ட் கட்சிக்கு புத்துயிரூட்டும் நோக்கில் மாவோயிச புத்தகங்களை விநியோகித்த குற்றத்துக்காக, அக்கட்சியின் உறுப்பினர்கள் என குற்றம் சாட்டி சுவைப், ஃபசல் (மற்றும் தலைமறைவாக உள்ளதாக குற்றம் சாட்டப்பட்ட உஸ்மான்) ஆகியோர் மீதும் காவல்துறை, சட்டவிரோத செயல்பாடுகள் தடுப்புச் சட்டத்தின் (1967) கீழ் வழக்கு பதிவு செய்தது.

குற்றம் சாட்டப்பட்டவர்களின் வீட்டிலிருந்து கைப்பற்றிய ஆவணங்கள், போஸ்டர்கள், நாட்குறிப்பு, புத்தகங்கள் மற்றும் பிற அரசியல் புத்தகங்களின் அடிப்படையில் மட்டுமே இந்த வழக்கைக் கட்டமைத்துள்ள காவல்துறையும் தேசிய புலனாய்வு முகமையும் தாஹாவின் வீட்டைச் சோதனையிடுகையில் அவர் மாவோயிஸ்டுகளை ஆதரிக்கும் முழக்கங்களை எழுப்பியதாகவும் குற்றம்சாட்டியிருந்தனர்.

டிசம்பர் மாதம் வழக்கு தேசிய புலனாய்வு முகமைக்கு மாற்றப்பட்டது முதலே, சுவைப் மற்றும் ஃபசல் நீதிமன்றக் காவலில் இருந்து வந்தனர். இதனிடையே அவர்கள் தாக்கல் செய்த ஜாமீன் மனுக்களை அமர்வு நீதிமன்றம் பலமுறை நிராகரித்தது.

இந்த வழக்கு, கேரளாவின் ஆளுங்கட்சியான மார்க்சிஸ்ட் கம்யூனிஸ்ட் கட்சிக்கும் அம்மாநில குடிமை சமூகத்தின் ஒரு பெரும் பிரிவினருக்குமிடையே மோதலை ஏற்படுத்தியது. காவல்துறையால் கைது செய்யப்பட்ட உடனே மார்க்சிஸ்ட் கம்யூனிஸ்ட் கட்சி இரண்டு மாணவர்களையும் கட்சியிலிருந்து இடைநீக்கம் செய்தது.

கேரள காவல்துறையின் அத்துமீறலை அனுமதித்ததாலும் குற்றம் சாட்டப்பட்டவர்களை மாவோயிஸ்டுகள், பயங்கரவாதிகள் எனக் கட்டமைத்ததாலும், சமூக சிந்தனையாளர்களும்  கட்சி சாரா செயற்பாட்டாளர்களும் பினராயி விஜயன் தலைமையிலான அரசுக்கு தொடர்ச்சியாக கண்டனங்கள் தெரிவித்து வந்தனர்.

இந்த வழக்கு கம்யூனிஸ்ட் கட்சிக்குள்ளும் கருத்துப் பிளவு ஏற்படுத்தியது. குற்றம்சாட்டப்பட்டவர்கள் மாவோயிஸ்டுகள் என பினரயி விஜயன் கூறியிருக்கையில், மார்க்சிஸ்ட் கம்யூனிஸ்ட் கட்சியின் பொதுச் செயலாளர் சீத்தாராம் யெச்சூரி மற்றும் பிரகாஷ் காரத், எம்.ஏ.பேபி, தாமஸ் ஐசக் உள்ளிட்ட தலைவர்களும் குற்றம் சாட்டப்பட்டவர்களை ஆதரித்து, கேரளாவின் ஆளும் இடது முன்னணி அரசுக்கு நேர் எதிராக தம்மை நிறுத்திக் கொண்டனர்.

தேசிய புலனாய்வு நீதிமன்றத்தின் கருத்து

ஜாமீன் மனு மீதான விசாரணை செப்டம்பர் 9-ம் தேதி நடந்தது. அரசுத் தரப்பு தாக்கல் செய்திருந்த, பெரும்பாலும் அரசியல் துண்டுபிரசுரங்கள் மற்றும் புத்தகங்கள் உள்ளிட்ட 12 வகைப்பட்ட சான்றுகளை தேசிய புலனாய்வு நீதிமன்றம் விசாரணைக்கு எடுத்துக்கொண்டது. அந்தச் சான்றுகளை, எதிர்தரப்பு வழக்கறிஞர்களான ஐசக் சஞ்சய், துஷர் நிர்மலி சாரதி ஆகியோரின் வாதங்களோடு நீதிமன்றம் சீர்தூக்கிப் பார்த்தது.

தேசிய புலனாய்வு முகமை குற்றம் சாட்டப்பட்டவர்களின் வீட்டிலிருந்து கைப்பற்றிய, அவர்களை குற்றம் சாட்ட அடிப்படையாக முன்வைத்த  பெரும்பாலான ஆவணங்கள் பொதுத்தளங்களில் எளிதாகக் கிடைக்கும் மற்றும் பரவலாக விவாதிக்கப்படும் ஆவணங்களே என்பதை நீதிமன்றம் விசித்திரமாக கருதியது.

மேற்குத் தொடர்ச்சி மலையின் சுற்றுச்சூழலைப் பாதுகாப்பது மற்றும் பழங்குடியினரின் நலனைப் பேணுவதற்கான மாதவ் காட்கில் அறிக்கையை அமல்படுத்தக்கோரும் துண்டறிக்கைகள், மாபெரும் ரஷ்ய புரட்சி (The great Russian Revolution) என்ற புத்தகம், கம்யூனிஸ்ட் தலைவர்களான மா சே துங், சேகுவேரா, காஷ்மீர் பிரிவினைவாதத் தலைவர் எஸ்.ஏ.எஸ்.ஜீலானி ஆகியோரின் புகைப்படங்கள், இஸ்லாமிய மற்றும் மார்க்சிய புத்தகங்கள் ஆகியவை தேசிய புலனாய்வு முகமை தாக்கல் செய்த சில ஆதாரங்கள்.

மேலும், சட்டவிரோத செயல்பாடுகள் தடுப்புச் சட்டம், குர்து இன மக்களுக்கு எதிரான துருக்கி நாட்டின் போர் மற்றும் காஷ்மீர் பள்ளத்தாக்கில் இந்திய அரசின் நடவடிக்கைகள் ஆகியவற்றிற்கு எதிரான துண்டறிக்கைகளையும், குற்றம் சாட்டப்பட்டவர்களுக்கு எதிரான ஆதாரங்களாக சமர்ப்பித்திருந்தது.

மாணவர்களுக்கு மாவோயிஸ்ட் கட்சியுடன் தொடர்பிருப்பதாக கட்டமைக்க, குர்து இன மக்களை ஆதரித்தும், பணமதிப்பிழப்பு, ஜிஷா மரணம் மற்றும் போலீஸ் அத்துமீறல்களுக்கு எதிர்ப்பு தெரிவித்தும் குற்றம்சாட்டப்பட்ட மாணவர்கள் தொடர்ந்து பல போராட்டங்களில் ஈடுபட்டதாக தேசிய புலனாய்வு முகமை கூறியது.

கூடவே, மாவோயிஸ்ட் கட்சி ஆவணங்கள், மத்தியக் குழு அறிக்கை மற்றும் கட்சிக்கொடிகளை அவர்களது வீட்டிலிருந்து கைப்பற்றியதாகவும் தேசிய புலனாய்வு முகமை கூறியுள்ளது.

இந்த ஆவணங்கள் எதுவும் வன்முறை பயங்கரவாத நடவடிக்கைகளுக்கு வழிவகுக்கும்படி இல்லை எனக் கூறி தேசிய புலனாய்வு முகமையின் வாதத்தை நீதிமன்றம் நிராகரித்துள்ளது.

“இவை அனைத்துமே அரசியல் மற்றும் சமூக தளங்களில் விவாதிக்கக்கூடிய பிரச்சனைகள்தான். போராட்டங்களும் அமைதியான முறையில், எந்த வன்முறையும் இல்லாமலேயே நடத்தப்பட்டுள்ளன” என நீதிமன்ற உத்தரவில் குறிப்பிடப்பட்டுள்ளது.

மாவோயிஸ்ட் கட்சியின் ஆவணங்கள் வைத்திருந்ததாக குற்றம் சாட்டப்பட்டது குறித்து, தாக்கல் செய்யப்பட்டுள்ள பெரும்பாலான ஆவணங்கள் இணையதளத்தில் பொதுமக்களுக்கு எளிதாகக் கிடைக்கின்றன என நீதிமன்றம் கூறியுள்ளது.

முதல் பார்வையில் இந்த ஆவணங்கள் அரசுக்கு எதிராக வன்முறை போராட்டங்களில் ஈடுபடும்படி மக்களைத் தூண்டும் விதமாக இல்லை. இந்திய கம்யூனிஸ்ட் கட்சி (மாவோயிஸ்ட்)-ஐ ஆதரிக்கும்படி மக்களுக்கு அறைகூவல் விடுக்கவுமில்லை. அவர்கள் முழுவதும் நியாயமற்றைவை என்று கருதும் அரசின் நடவடிக்கையை எதிர்த்து போராடும்படி மட்டுமே அறைகூவல் விடுக்கப்பட்டுள்ளது. குறிப்பிட்ட நிகழ்ச்சி உண்மையில் நியாயப்படுத்தக் கூடியதா இல்லையா என்பது எங்களது அக்கறையின் கீழ் வரவில்லை என்று நீதிமன்றம் தனது உத்தரவில் கூறியுள்ளது.

மாவோயிஸ்ட் கட்சிக்காக ஃபசல் தயாரித்துள்ளதாக ஒரே ஒரு ஆவணத்தை மட்டுமே தேசிய புலனாய்வு முகமை சமர்ப்பித்துள்ளது. அந்த ஆவணம், “இந்துத்துவ பார்ப்பன பாசிச ஆட்சி ஜம்மு காஷ்மீர் மக்களின் மீது செலுத்தும் ஆதிக்கத்தை எதிர்த்து, ஜம்மு காஷ்மீர் மக்களின் விடுதலைப் போராட்டத்துக்கு ஆதரவு கோரி” என்று எழுதப்பட்ட பொது இடங்களில் வைப்பதற்கான பேனர் என்று நீதிமன்றம் கூறியது.

”இந்திய அரசியலமைப்பு சட்டப் பிரிவுகள் 370 மற்றும் 35ஏ நீக்கப்பட்டதற்கு பிறகான சூழலில் இந்த பேனர் தயாரிக்கப்பட்டுள்ளது. அச்சூழலில் இருந்து பிரித்து செய்யும் எந்த மதிப்பீடும் மோசமான முடிவுகளுக்கு இட்டுச்செல்லும்” என்றும் நீதிமன்றம் கூறியுள்ளது.

”போராடும் உரிமை என்பது அரசியலமைப்பின் கீழ் உறுதிசெய்யப்பட்ட உரிமை” என நீதிபதி பாஸ்கர் கூறினார். மேலும் “தவறான காரணத்துக்காக இருந்தாலும் கூட, அரசின் முடிவுகள் மற்றும் திட்டங்களுக்கு எதிராக போராடுவதை தேசதுரோகம் என்றோ அல்லது திட்டமிட்டு பிரிவினையைத் தூண்டுவது என்றோ கூற முடியாது.” என்றார், அவர்.

குற்றம் சாட்டப்பட்டவர்களுக்கு எதிராக ”கண்டிக்கத்தக்க எழுத்துக்கள்” என  சமர்ப்பிக்கப்பட்டுள்ள ஆதாரங்கள் எதுவும் தடை செய்யப்பட்டவை இல்லை. மேலும் அவை வெறுப்பைத் தூண்டும் விதமாகவோ, இந்திய அரசுக்கு எதிராகவோ, அரசை அவமதிக்கும் விதத்திலோ இல்லை எனவும் நீதிமன்றம் கூறியுள்ளது.

நமது அரசியலமைப்போடு உடன்படாவிட்டாலும் கூட மாவோயிஸ்டாக இருப்பது, மாவோயிசம் மற்றும் வர்க்கபேதம் குறித்த புத்தகங்கள் வாசிப்பது எதுவும் ”குற்றம் இல்லை” என நீதிமன்றம் கூறியுள்ளது. வன்முறையைத் தூண்டும் வகையில் இருந்தாலொழிய தனிநபர் அரசியல் நம்பிக்கைகள் ஆபத்தானதாக கருதப்பட முடியாது எனவும் கூறியுள்ளது.

மேலும், குற்றம் சாட்டப்பட்டுள்ள இரண்டு பேரும் ஆழமான அரசியல் நம்பிக்கைகள் உடையவர்கள், அரசு நடவடிக்கைகளை விமர்சிக்கும் விதமான செயல்களில் ஈடுபட்டுள்ளனர் என்பதும் தெளிவாகிறது என்றாலும் அதனால் அவர்கள் மாவோயிஸ்ட் கட்சி உறுப்பினர்கள் அல்லது அக்கட்சியால் இயக்கப்படுகிறார்கள் என அர்த்தம் ஆகாது என நீதிமன்றம் தெரிவித்துள்ளது.

குற்றம் சாட்டப்பட்டுள்ளவர்கள் சர்ச்சைக்குள்ளான ஒவ்வொரு சமூக அரசியல் பிரச்சனையிலும் முனைப்பாக இருந்திருக்கின்றனர் என்பதால் அவர்கள் தீவிரவாத சித்தாந்தங்களுக்கு பலியாகும் நிலையில் இருந்துள்ளனர் என்றும், அது அவர்களைத் தடை செய்யப்பட்ட அமைப்புடன் தொடர்பு ஏற்படுத்திக்கொள்ள தூண்டியிருக்கலாம் என்றும் நீதிமன்றம் கூறியுள்ளது. இருப்பினும், ஒரு குற்றச்செயலில் அவர்கள் உடந்தையாக இருந்தார்கள் என்பதற்கு போதுமான ஆதாரங்களை அரசுத் தரப்பு திரட்ட முடியவில்லை. இதனால், முதல் குற்றவாளி சுவைபுக்கு எதிரான சட்டவிரோத செயல்பாடுகள் தடுப்புச் சட்டப் பிரிவுகளைக் கைவிடும் கட்டாயம் அரசுத் தரப்புக்கு ஏற்பட்டுள்ளது என்பதையும் நீதிமன்றம் சுட்டிக் காட்டியுள்ளது.

இந்தச் சூழ்நிலைகளில், நீதிமன்றம் சற்றே கருணையான அணுகுமுறையைக் கையாள வேண்டும் என்று கூறிய நீதிபதி பாஸ்கர், இந்த ஜாமீன் மாணவர்கள் தமது அரசியல் நிலைப்பாடுகளை மறுபரிசீலனை செய்வதற்கான வாய்ப்பாக அமையும் எனவும் நம்பிக்கை தெரிவித்தார்.

(www.thewire.in இணையதளத்தில் வெளியான கட்டுரையின் மொழியாக்கம்)

சுதந்திர ஊடகத்தை ஆதரிக்க

உங்கள் பங்களிப்பு, அரண்செய் ஊடகத்தின் சுதந்திரத்தை உறுதி செய்கிறது. இதன் மூலம் எங்களால் தொடர்ந்து சிறந்த செய்திகளை அனைவருக்கும் வழங்க முடியும். உங்கள் பங்களிப்பு எவ்வளவு சிறிதாயினும் அல்லது பெரிதாயினும் அது எங்களின் எதிர்காலத்திற்கு மிகவும் அவசியமானது.

மற்ற சில பதிவுகள்