Aran Sei

‘அமித் ஷாவுக்கு போன் போட்டா கலவரம் ஆகிடும்’ – மிரட்டல் விடுத்த பாஜக பிரமுகர்கள் கைது

சென்னை ஐஸ்ஹவுஸ் பகுதியில், சிற்றுண்டிக்கடையில், சாப்பிட்டு விட்டு பணம் கொடுக்காமல் தகராறு செய்த பாஜகவை சேர்ந்த இரண்டுபேரை காவல்துறையினர் கைது செய்துள்ளனர்.

பாரதிய ஜனதா கட்சிக்காரர் என்று கூறிக்கொள்ளும் ஒருவர், கடைக்காரர்களை மிரட்டும் வீடியோ ஒன்று நேற்று  சமூக வலைதளங்களில் பரவியது.

@Mark2Kali என்ற டிவிட்டர் கணக்கில் பகிரப்பட்ட அந்த வீடியோவில், “மதக்கலவரமாகும்” என்று ஒருவர் கூறுவதுடன் அந்த வீடியோ தொடங்குகிறது. தான் பாஜகவை சேர்ந்தவன் என்று கூறும் அந்த நபர், மற்றொருவரை காட்டி “நான் அவனை கன்ட்ரோல் பண்ணி வச்சிருக்கேன். அவன் இந்து முன்னணி ஆளு” என்று கூறுகிறார்.

மது அருந்தியதாக தோன்றும் அந்த நபரை சிலர் சமாதானம் செய்ய முயல்கிறார்கள். ஆனால், சமாதானம் அடையாத அந்த நபர் “பாஜககாரன் என்றால் ஒரு மரியாதை இல்லையா” என்றும் “இந்தியாவையே ஆளும் ஒரு கட்சிக்கு மரியாதை இல்லையா” என்றும் கேட்பது பதிவாகியுள்ளது.
ஒரு கட்டத்தில், ரோந்து வாகனத்தில் வந்திறங்கும் காவல்துறையினரிடம் அந்த நபர் பேசுகின்றார். ஒரு காவலர் அவரை சமாதானம் செய்ய முயல்கிறார், அப்போது அவர் “மதக்கலவரம் ஆயிடும். இந்தியாவுல” என்று காவல்துறையின் முன்னிலையிலேயே கூறுகிறார். ஆனால், காவலர்கள் அவர் மீது எந்த நடவடிக்கையும் எடுக்காமல், அவரை சமாதானம் செய்ய முயல்வதையே அந்த வீடியோவில் பார்க்க முடிகிறது.
“அமித் ஷா (உள்துறை அமைச்சர்) பிஏவுக்கு ஃபோன போடுவேன்… கலவரம் ஆயிடும்… ஆயிரம் பேர் ரெடியா இருக்காங்க” என்று அங்கிருக்கும் கடைக்காரர்களை மிரட்டும் தொனியில் அவர் பேசுவதும் வீடியோவில் பதிவாகியுள்ளது. ஆனால், அப்போதும் அங்கிருக்கும் காவல்துறையினர், அவர் மீது எந்த நடவடிக்கையும் எடுக்காமல், அவரை சமாதானப்படுத்தவே முயற்சி செய்வதை வீடியோவில் பார்க்க முடிகிறது.
இறுதியாக, இருக்கர வாகனத்தை ஒருவர் ஓட்ட, அதன் பின்னால் அமர்ந்து அந்த நபர் அந்த இடத்தை விட்டு செல்வதை வீடியோவில் பார்க்க முடிகிறது.
இந்நிலையில், இந்த விவகாரம் தொடர்பாக இரண்டு பேரை காவல்துறையினர் கைது செய்துள்ளதாக தி இந்து செய்திவெளியிட்டுள்ளது.
அந்த செய்தியில், ஐஸ்ஹவுசில் உள்ள, முகம்மது அபூபக்கர் என்பவருக்கு சொந்தமான சிற்றுண்டி கடைக்கு, பாஸ்கரன், புருஷோத்தமன், சூர்யா ஆகிய மூவரும் நேற்று (12.01.21) இரவு சென்றுள்ளனர். கடை மூடப்பட்டு வந்த நிலையில், கடையில் வேலை செய்பவர்கள் உணவு இல்லை என்று அவர்களிடம் கூறியுள்ளனர். அந்த மூன்று பேரும் ஊழியர்களை மிரட்டி, உணவு வேண்டும் என்று வற்புறுத்தியுள்ளனர். அதைத்தொடர்ந்து, ஊழியர்கள் அவர்களுக்காக உணவை தயார் செய்து கொடுத்துள்ளனர். உணவை சாப்பிட்டு முடித்து விட்டு, அவர்கள் பணம் கொடுக்காமல் சென்றுள்ளனர். அவர்களிடம் பணம் கேட்ட கடை ஊழியர்களிடம் அந்த மூவரும் தகராறு செய்துள்ளனர் என்று காவல்துறை தரப்பில் தெரிவிக்கப்பட்டுள்ளதாக கூறப்பட்டுள்ளது.
கடை உரிமையாளர் அபூபக்கர் அளித்த புகாரின் பேரில், பாஸ்கரன் (வயது 30), புருஷோத்தமன் (வயது 32) ஆகிய இருவரையும் ஐஸ்ஹவுஸ் காவல்துறையினர் கைது செய்துள்ளதாகவும், சூர்யா என்ற மற்றொரு நபரை தேடி வருவதாகவும் தி இந்து செய்தியில் குறிப்பிடப்பட்டுள்ளது.

சுதந்திர ஊடகத்தை ஆதரிக்க

உங்கள் பங்களிப்பு, அரண்செய் ஊடகத்தின் சுதந்திரத்தை உறுதி செய்கிறது. இதன் மூலம் எங்களால் தொடர்ந்து சிறந்த செய்திகளை அனைவருக்கும் வழங்க முடியும். உங்கள் பங்களிப்பு எவ்வளவு சிறிதாயினும் அல்லது பெரிதாயினும் அது எங்களின் எதிர்காலத்திற்கு மிகவும் அவசியமானது.

மற்ற சில பதிவுகள்