Aran Sei

சடலங்களை சுமக்கும் கங்கை என ஒன்றிய அரசை விமர்சிக்கும் குஜராத்திய கவிதை – இலக்கிய நக்சல்கள் என குற்றஞ்சாட்டிய சாகித்திய அகாதமி தலைவர்

ங்கை ஆற்றில் மிதக்கும் கொரோனா நோயாளிகளின் உடல்கள் குறித்து குஜராத்தி கவிஞர் பருல் காகர் எழுதிய கவிதையை விமர்சித்துள்ள குஜராத் சாகித்திய அகாதமி தலைவர் விஷ்ணு பாண்ட்யா, கம்யூனிஸ்டுகள் தீங்கிழைக்கும் நோக்கத்துடன் இப்போது இலக்கியத்திலும் குதித்துள்ளனர் என்றும் அவர்கள் இலக்கிய நக்சல்கள் என்றும் குற்றஞ்சாட்டியுள்ளார்.

மறுபுறம், பல எழுத்தாளர்கள் பருல் காகருக்கு தங்கள் ஆதரவை தெரிவித்ததுடன், பாண்ட்யாவின் நிலைப்பாட்டையும் கடுமையாக விமர்சித்துள்ளனர்.

பருல் காகரின் ‘ஷாப்-வாகினி கங்கா’ (சடலங்களை சுமக்கும் கங்கை) என்று தலைப்பிடப்பட்ட கவிதையானது, உத்தரபிரதேசம் மற்றும் பீகார் மாநில கங்கை ஆற்றில் கொட்டப்படும் கொரோனா நோயாளிகளின் சடலங்களை சுட்டிக்காட்டி, கொரோனா தொற்றுநோயை ஒன்றிய அரசு எவ்வாறு கையாள்கிறது என்பதை விமர்சித்துள்ளது.

கங்கையாற்றில் அதிகரிக்கும் கொரோனா நோயாளிகளின் சடலங்கள் : ஆம்புலன்ஸில் கொண்டு வந்து கொட்டுவதாக மக்கள் வேதனை

இந்த கவிதை உடனடி பேசுப் பொருளானதோடு, பல்வேறு மொழிகளிலும் மொழிபெயர்க்கப்பட்டு சமூக வலைதளங்களில் பரவியுள்ளது.

இந்நிலையில், மாநில அரசின் கட்டுப்பாட்டில் இயங்கும் குஜராத் சாகித்திய அகாதமியின் அதிகாரப்பூர்வ இதழான ‘சப்தஸ்ருஷ்டி’-யின் ஜூன் மாத பதிப்பில் உள்ள தலையங்கத்தில், பாண்ட்யா இந்த கவிதையை பெயர் குறிப்பிடாமல் விமர்சித்துள்ளார்.

‘இல்லை. இது ஒரு கவிதை அல்ல. மாறாக, இது கட்டற்ற சுதந்திரத்தை விரும்பக்கூடியவர்களால் தவறாக பயன்படுத்தப்பட்டிருக்கும் ஒரு கவிதை’ என்ற தலைப்பில் எழுதப்பட்டுள்ள அத்தலையங்கத்தில், “இந்தக் கவிதை ஒன்றியத்திற்கும் தேசியவாத சித்தாந்தங்களுக்கும் எதிரானவர்களால் தவறாக பயன்படுத்தப்பட்டுள்ளது. கம்யூனிஸ்டுகளும் தாராளவாதிகள் என்று அழைக்கப்படுபவர்களும் நம் நாட்டில் கட்டற்ற சுதந்திர நிலையை உருவாக்க விரும்புகிறார்கள். எல்லா துறைகளிலும் சுறுசுறுப்பாக செயல்பட்டுக்கொண்டிருக்கும் அவர்கள், தீங்கிழைக்கும் நோக்கத்துடன் இப்போது இலக்கியத்திலும் குதித்துள்ளனர்.” என்று தெரிவித்துள்ளார்.

கங்கையாற்றில் அதிகரிக்கும் கொரோனா நோயாளிகளின் சடலங்கள் : ஆம்புலன்ஸில் கொண்டு வந்து கொட்டுவதாக மக்கள் வேதனை

மேலும், “தங்கள் சொந்த துயர்களின் காரணமாக இக்கவிதையோடு, தங்களை இணைத்துக்கொள்ளும் அப்பாவி மக்களை இந்த இலக்கிய நக்சல்கள் தங்கள் வசம் இழுக்கிறார்கள். இக்கவிதையில் எழுதப்பட்டிருப்பதை ஒருபோதும் அகாதமியால் ஏற்றுக்கொள்ள முடியாது.” என்று கூறியுள்ளார்.

மனிஷி ஜானி தலைமையிலான குஜராத்தி லேகக் மண்டல் அமைப்பைச் சேர்ந்த 100-க்கும் மேற்பட்ட குஜராத்தி எழுத்தாளர்கள் கவிஞர் பருல் காகருக்கு ஆதரவு தெரிவித்துள்ளனர்.

Source; pti

சுதந்திர ஊடகத்தை ஆதரிக்க

உங்கள் பங்களிப்பு, அரண்செய் ஊடகத்தின் சுதந்திரத்தை உறுதி செய்கிறது. இதன் மூலம் எங்களால் தொடர்ந்து சிறந்த செய்திகளை அனைவருக்கும் வழங்க முடியும். உங்கள் பங்களிப்பு எவ்வளவு சிறிதாயினும் அல்லது பெரிதாயினும் அது எங்களின் எதிர்காலத்திற்கு மிகவும் அவசியமானது.

மற்ற சில பதிவுகள்