Aran Sei

” கடன் வழங்குவதில் முறைகேடு செய்தார் ” – தனியார் வங்கி ஐசிஐசிஐயின் சந்தா கொச்சார் மீது குற்றப் பத்திரிகை

Image Credit : livelaw.in

சிஐசிஐ வங்கியின் முன்னாள் நிர்வாக இயக்குநர் சந்தா கொச்சார், தன்னுடைய பதவியை தவறாக பயன்படுத்தினார் என்ற அமலாக்கத் துறையின் குற்றப் பத்திரிகையை, வழக்கை விசாரிக்கும் சிறப்பு நீதிமன்றம் விசாரணைக்கு எடுத்துக் கொண்டுள்ளது என்று லைவ் லா செய்தி வெளியிட்டுள்ளது.

இந்த வழக்கில் பண மோசடி தடுப்புச் சட்டத்தின் கீழ் குற்றம் சாட்டப்பட்டுள்ள 11 பேருக்கும் நோட்டீஸ்களை அனுப்பும்படி உத்தரவிட்ட சிறப்பு நீதிபதி அபிஜித் நந்தகாவ்கர், அவர்களை நீதிமன்றத்தின் முன் ஆஜராகும்படி கூறியுள்ளார்.

சந்தா கொச்சார் தனது வங்கி உயர் பதவியை தவறாக பயன்படுத்தி, வீடியோகான் நிறுவனத்துக்கும் குற்றம் சாட்டப்பட்ட வி என் தூத்-க்கும் கடன் வழங்கியுள்ளதாகவும், அதற்கு பதிலாக தனது கணவர் தீபக் கொச்சார் மூலமாக சட்டவிரோதமான ஆதாயத்தை பெற்றிருப்பதாகவும் குற்றப் பத்திரிகை மூலம் தெரிகிறது என்று நீதிபதி குறிப்பிட்டுள்ளார்.

பொதுத்துறை வங்கிகளின் வாராக்கடன் விகிதம் வரலாறு காணாதவகையில் உயரும் – ரிசர்வ் வங்கி கணிப்பு

வழக்கு பிப்ரவரி 12-ம் தேதிக்கு ஒத்தி வைக்கப்பட்டுள்ளது.

ஜூன் 2009-க்கும் அக்டோபர் 2011-க்கும் இடையே, 5 வீடியோகான் குழும நிறுவனங்களுக்கு ஐசிஐசி வங்கி ரூ 1,574 கோடி மதிப்பிலான கடன்களை வழங்கியதில் முறைகேடுகள் தொடர்பாக, ஜனவரி 2019-ல் சிபிஐ வழக்கு பதிவு செய்திருந்தது. இந்தக் கடன்கள், வங்கியின்கடன் வழங்கும் குழுவின் விதிகளுக்கும் கொள்கைக்கும் மாறாக வழங்கப்பட்டது என்ற அமலாக்கத் துறை குற்றம் சாட்டியிருந்தது.

2009-ம் ஆண்டு செப்டம்பர் 9-ம் தேதி வீடியோகானுக்கான கடனின் முதல் தவணை ரூ 300 கோடி வழங்கப்பட்ட அடுத்த நாளே, வீடியோகான் முதலாளி வி என் தூத், சந்தா கொச்சாரின் கணவரான தீபக் கொச்சாருக்கு சொந்தமான நூபவர் நிறுவனத்துக்கு ரூ 64 கோடி அனுப்பியிருந்ததாக அமலாக்கத் துறை விசாரணையில் தெரிய வந்திருக்கிறது.

தூத் அனுப்பிய ரூ 64 கோடி நிறுவனத்துக்கான பங்கு முதலீடு என்றும் வீடியோகனுக்கு ஐசிஐசிஐ வங்கி வழங்கிய கடனுக்கும் அதற்கும் எந்தத் தொடர்பும் இல்லை என்று சந்தா கொச்சாரும், தீபக் கொச்சாரும் பதிலளித்துள்ளனர்.

ஐசிஐசி வங்கி வீடியோகானுக்கு வழங்கிய கடன்கள் வாராக் கடன்களாக அறிவிக்கப்பட்டு, அது கடன் வாங்கிய நிறுவனங்களுக்கும் குற்றம் சாட்டப்பட்டவர்களுக்கும் ஆதாயமாக மாற்றப்பட்டது என்று அமலாக்கத் துறை குற்றம் சாட்டியிருந்தது. ஏப்ரல் 26, 2012 நிலவரப்படி இந்த மோசடி செய்யப்பட்ட பணத்தின் அளவு ரூ 1,730 கோடி என்று அது கூறியிருந்தது.

சந்தா கொச்சார் 1984-ல் ஐசிஐசிஐ வங்கியில் வேலைக்கு சேர்ந்து, 2009-ம் ஆண்டு அதன் நிர்வாக இயக்குநர் மற்றும் தலைமை நிர்வாக அலுவலராக உயர்ந்தார்.

வீடியோகான் நிறுவனத்தின் சேர்மனும் நிர்வாக இயக்குநருமான வி என் தூத்-டன் தனது கணவர் தீபக் கொச்சார் நெருக்கமான தொடர்பு கொண்டிருப்பதை அறிந்திருந்தும், கடனுக்கான ஒப்புதல் வழங்கும் குழுவில் இந்த உண்மையை தெரிவிக்கவோ, வீடியோகானுக்கான கடன் தொடர்பாக முடிவெடுக்கும் போது குழுவிலிருந்து விலகிக் கொள்ளவோ இல்லை என்று சிபிஐ புகார் தெரிவிக்கிறது.

மும்பையில் உள்ள சந்தா கொச்சாரின் குடியிருப்பு ரூ 10 கோடி மதிப்பிலானது என்றும், அதனை இந்தக் குற்றத்தின் மூலம் கிடைத்த பணத்தில் வாங்கியதாகவும், அதை வெறும் ரூ 11 லட்சத்துக்கு வாங்கியதாக கணக்கு காட்டியதாகவும் சந்தா கொச்சார் மீதும் தீபக் கொச்சார் மீதும் குற்றம் சாட்டப்பட்டுள்ளது.

தீபக் கொச்சார் பிணை மனு மறுக்கப்பட்டு தொடர்ந்து சிறையில் உள்ளார்.

சுதந்திர ஊடகத்தை ஆதரிக்க

உங்கள் பங்களிப்பு, அரண்செய் ஊடகத்தின் சுதந்திரத்தை உறுதி செய்கிறது. இதன் மூலம் எங்களால் தொடர்ந்து சிறந்த செய்திகளை அனைவருக்கும் வழங்க முடியும். உங்கள் பங்களிப்பு எவ்வளவு சிறிதாயினும் அல்லது பெரிதாயினும் அது எங்களின் எதிர்காலத்திற்கு மிகவும் அவசியமானது.

மற்ற சில பதிவுகள்