Aran Sei

‘மாநிலங்களுக்குள் பாகுபாடு காட்டும் பாஜக’: கூட்டாட்சிக் கொள்கை பாதிக்குமென கே.எஸ்.அழகிரி எச்சரிக்கை

மாநிலங்களின் உரிமைகளைப் பாதுகாக்கிற வகையில் மாநிலங்களுக்குச் சேரவேண்டிய வரி வருவாயை வழங்குவதில் மத்திய பாஜக அரசு பாரபட்சம் காட்டுவதை வன்மையாகக் கண்டிக்கிறேன் என்றும் இத்தகைய போக்கு நீடிக்குமேயானால் கூட்டாட்சிக் கொள்கையே கடுமையான பாதிப்புக்குள்ளாக நேரிடும் என்று தமிழக காங்கிரஸ் கமிட்டி தலைவர் கே.எஸ்.அழகிரி எச்சரித்துள்ளார்.

இதுகுறித்து, இன்று (மே 30) அவர் விடுத்துள்ள அறிக்கையில், “மத்திய நிதியமைச்சர் நிர்மலா சீதாராமன் தலைமையில் மே 28 அன்று காணொலி வாயிலாக ஜிஎஸ்டி மன்றத்தின் 43-வது கூட்டம் நடைபெற்றது. அனைத்து மாநிலங்களின் கோரிக்கைகளுக்கு நியாயம் வழங்குகிற வகையில் மத்திய அரசு செயல்படுகிறதா என்ற கேள்வியை இந்தக் கூட்டம் எழுப்புகிறது. அதிக ஜிஎஸ்டி வருவாய் தரும் எதிர்க்கட்சிகள் ஆளும் மேற்கு வங்காளம், ராஜஸ்தான், தமிழ்நாடு, கேரளா, சத்தீஸ்கர், பஞ்சாப், டெல்லி, மகாராஷ்டிரா ஆகிய மாநிலங்களின் கோரிக்கைகளைப் பாரபட்சமின்றி பார்க்காமல், அரசியல் உள்நோக்கத்தோடு பார்ப்பது மிகுந்த வேதனையைத் தருகிறது.” என்று தெரிவித்துள்ளார்.

“ஜிஎஸ்டி கவுன்சிலில் ஒவ்வொரு மாநிலத்திற்கு ஒவ்வொரு வாக்கு என்பது ஏற்கக்கூடியது அல்ல. வரிவருவாய் அதிகமாக உள்ள மாநிலமும், வரிவருவாய் மிக மிகக் குறைவாக உள்ள மாநிலமும் ஒன்றாகக் கருதப்படுவது மிகப்பெரிய அநீதியாகும். வருவாய் இழப்பீட்டுக் காலத்தை 5 ஆண்டுகள் நீட்டிக்க வேண்டும். கொரோனா தொற்று நிவாரணப் பொருட்களுக்கு பூஜ்ய வரி விதிக்க வேண்டும் போன்ற கோரிக்கைகளை மத்திய நிதியமைச்சர் கண்டுகொள்ளவில்லை. மத்திய நிதியமைச்சர் நிர்மலா சீதாராமன் தலைமையில் மே 28 அன்று காணொலி வாயிலாக ஜிஎஸ்டி மன்றத்தின் 43-வது கூட்டம் நடைபெற்றது. தமிழகத்தின் சார்பில் நிதியமைச்சர் பழனிவேல் தியாகராஜன் உள்ளிட்ட 31 மாநில நிதியமைச்சர்கள் இக்கூட்டத்தில் பங்கேற்றனர்.” என்று கே.எஸ்.அழகிரி கூறியுள்ளார்.

‘ஜிஎஸ்டி அமலுக்கு பின் கற்பனைக்கு எட்டாத அளவிற்கு ஒன்றிய அரசிடம் அதிகாரங்கள் குவிந்துள்ளன’ – ஜிஎஸ்டி கூட்டத்தில் பழனிவேல் தியாகராஜன்

“இவர்கள் 16 அரசியல் கட்சிகளைச் சேர்ந்தவர்கள். மேலும் 31 மாநிலங்களில் 17இல் பாஜகவும், 14இல் பாஜக அல்லாத ஆட்சியும் நடைபெற்று வருகிறது. அனைத்து மாநிலங்களின் கோரிக்கைகளுக்கு நியாயம் வழங்குகிற வகையில் மத்திய அரசு செயல்படுகிறதா என்ற கேள்வி எழுந்துள்ளது. மாநிலங்களைப் பொறுத்தவரை ஜிஎஸ்டி வரியிலிருந்துதான் 50 சதவீத வருமானத்தைப் பெறுகிறது. இதில் பாஜக அல்லாத கட்சிகள் ஆட்சி செய்யும் 14 மாநிலங்களில்தான் இந்தியாவின் மக்கள்தொகையில் 50 சதவீதத்தினர் வசித்து வருகிறார்கள். மொத்த ஜிஎஸ்டி வருவாயில் 60 சதவீதமும், மொத்த உள்நாட்டு உற்பத்தியில் 63 சதவீதமும் பாஜக ஆட்சி செய்யாத மாநிலங்களில் இருந்துதான் வருகிறது.” என்று அவர் குறிப்பிட்டுள்ளார்.

“இந்த அடிப்படை உண்மையை உணராமல் மேற்கு வங்காளம், ராஜஸ்தான், தமிழ்நாடு, கேரளா, சத்தீஸ்கர், பஞ்சாப், டெல்லி, மகாராஷ்டிரா ஆகிய மாநிலங்களில் ஆட்சி செய்கிற பாஜக அல்லாத கட்சிகள் முன்வைக்கிற கோரிக்கைகளைப் பாரபட்சமின்றி பார்க்காமல், அரசியல் உள்நோக்கத்தோடு பார்ப்பது மிகுந்த வேதனையைத் தருகிறது. ஜிஎஸ்டி கவுன்சிலில் ஒவ்வொரு மாநிலத்திற்கு ஒவ்வொரு வாக்கு என்பது ஏற்கக்கூடியது அல்ல. வரிவருவாய் அதிகமாக உள்ள மாநிலமும், வரிவருவாய் மிக மிகக் குறைவாக உள்ள மாநிலமும் ஒன்றாகக் கருதப்படுவது மிகப்பெரிய அநீதியாகும். 2017இல் ஜிஎஸ்டி வரி அறிமுகப்படுத்தும்போது கூட்டுறவு கூட்டாட்சி என்ற கவர்ச்சிகரமான வார்த்தையைப் பிரதமர் மோடி பயன்படுத்தினார்.” என்று தனது அறிக்கையில் கே.எஸ்.அழகிரி கூறியுள்ளார்.

கொரோனா நோயாளிகளுக்கான ஆகிஸிஜன் செறிவூட்டிகளுக்கு ஜிஎஸ்டி விலக்கு கேட்டு வழக்கு: முடியாதென்று மறுத்த ஒன்றிய அரசு

“மத்திய அரசிடமிருந்து தமிழகத்திற்கு ரூ.12,000 கோடிவரை நிலுவைத்தொகை வரவேண்டியுள்ளது. மாநிலங்களின் வரி வருவாய் ஆண்டுதோறும் 14 சதவீதம் வளர்ச்சிக்கு மத்திய அரசு உத்தரவாதம் அளித்தது. இந்த உத்தரவாதம் வருகிற 2022ஆம் ஆண்டு ஜூலை மாதத்தோடு முடியப்போகிறது. இதை மேலும் 5 ஆண்டுகள் நீட்டிக்க வேண்டும் என்ற மாநில அரசுகளின் கோரிக்கையை மத்திய அரசு ஏற்பதற்குத் தயாராக இல்லை. இத்தகைய போக்கு காரணமாக ஜிஎஸ்டியின் கட்டமைப்பே சிதைந்து சின்னாபின்னமாகி விடுமோ என்ற அச்சம் ஏற்பட்டுள்ளது.” என்று கே.எஸ்.அழகிரி எச்சரித்துள்ளார்.

“மாநிலங்களின் கோரிக்கையைப் பரிவுடன் கவனிக்க ஜி.எஸ்.டி. கவுன்சில் தயாராக இல்லை. இதனால்தான் 7 பாஜக அல்லாத மாநிலங்களில் ஆட்சி செய்கிற நிதியமைச்சர்கள் தனியாகக் கூடி வருவாய் இழப்பீட்டுக் காலத்தை 5 ஆண்டுகளுக்கு மேலும் நீடிக்க வேண்டும், கொரோனா தொற்று நிவாரணப் பொருட்களுக்கு பூஜ்ய வரி விதிக்க வேண்டும் உள்ளிட்ட கோரிக்கைகளை முன்வைத்தனர். ஆனால், இவற்றை மத்திய நிதியமைச்சர் கவனிக்கத் தயாராக இல்லை. கொடிய கரோனா தொற்றுக் காலத்தில் கூட வரிவருவாயை விட்டுக்கொடுக்க மத்திய அரசு முன்வரவில்லை.” என்று அவர் விமர்சித்துள்ளார்.

பெட்ரோல், டீசல் விலை – ” ஜிஎஸ்டி தொடர்பான கேள்விகள் நிதி அமைச்சகத்துடன் தொடர்பில்லாதவை” : நிர்மலா சீதாராமன்

“எனவே, மத்திய பாஜக அரசு மாநிலங்களின் நிதி சுதந்திரத்தைப் பறிக்க முயற்சி செய்கிறது. மாநிலங்களுக்கு வழங்க வேண்டிய இழப்பீட்டுத் தொகையைச் செலுத்துவதில் பல்வேறு காரணங்களைக் கூறி காலம் தாழ்த்தி வருகிறது. இதனால் மாநிலங்களின் வரி வருவாய் குறைந்து கொரோனா தொற்று போன்ற பேரிடர்க் காலங்களில் அவற்றை எதிர்கொள்வதில் கடுமையான நிதி நெருக்கடியில் சிக்கிக்கொள்ள வேண்டிய நிலை ஏற்பட்டிருக்கிறது.” என்று கே.எஸ்.அழகிரி தெரிவித்துள்ளார்.

“மாநிலங்களின் உரிமைகளைப் பாதுகாக்கிற வகையில் மாநிலங்களுக்குச் சேரவேண்டிய வரி வருவாயை வழங்குவதில் மத்திய பாஜக அரசு பாரபட்சம் காட்டுவதை வன்மையாகக் கண்டிக்கிறேன். இத்தகைய போக்கு நீடிக்குமேயானால் கூட்டாட்சிக் கொள்கையே கடுமையான பாதிப்புக்குள்ளாக நேரிடும் என எச்சரிக்க விரும்புகிறேன்.” என்று கே.எஸ்.அழகிரி தனது அறிக்கையில் எச்சரித்துள்ளார்.

சுதந்திர ஊடகத்தை ஆதரிக்க

உங்கள் பங்களிப்பு, அரண்செய் ஊடகத்தின் சுதந்திரத்தை உறுதி செய்கிறது. இதன் மூலம் எங்களால் தொடர்ந்து சிறந்த செய்திகளை அனைவருக்கும் வழங்க முடியும். உங்கள் பங்களிப்பு எவ்வளவு சிறிதாயினும் அல்லது பெரிதாயினும் அது எங்களின் எதிர்காலத்திற்கு மிகவும் அவசியமானது.

மற்ற சில பதிவுகள்