Aran Sei

`நீட் மற்றும் 7.5 % இட ஒதுக்கீட்டில் அடிமை அரசின் நாடகங்கள்’ – விளக்கும் ஸ்டாலின்

நீட் தேர்வின் தீங்கு குறித்தும், 7.5 சதவீத இட ஒதுக்கீட்டில் அதிமுக அரசின் செயற்பாடுகள் குறித்தும் தி.மு.க. தொண்டர்களுக்கு, அக்கட்சியின் தலைவர் மு.க.ஸ்டாலின் கடிதம் எழுதியுள்ளார்.

கிளம்பிற்றுகாண் தமிழ்ச் சிங்கக் கூட்டம், கிழித்தெறிய தேடுதுகாண் பகைக்கூட்டத்தை’ என்று புரட்சிக்கவிஞர் பாவேந்தர் பாரதிதாசன் வரிகளுக்கேற்ப, ஆளுநர் மாளிகை முன்பு திராவிட முன்னேற்றக் கழகம், 24 மணி நேர இடைவெளியில் அழைப்பு விடுத்து நடத்திய பெருந்திரள் ஆர்ப்பாட்டம், நாட்டின் வருங்காலத் தலைமுறையாம் மாணவர் சமுதாயத்திற்குப் புதிய நம்பிக்கையை வழங்கியிருப்பதாக ஸ்டாலின் குறிப்பிடுகிறார்.

கொலைகார  நீட்

மாணவர்களின் மருத்துவக் கனவைச் சிதைக்கின்ற ‘கொலைகார’ நீட் தேர்வு கூடவே கூடாது என்பதுதான் தி.மு.கழகத்தின் நிலை என்றும், அதனை ரத்து செய்ய வேண்டும் என்பதற்காகச் சட்டமன்றத்தில் நிறைவேற்றப்பட்ட தீர்மானங்களுக்கு முழு ஒத்துழைப்பு கொடுத்தோம் என்றும் கூறுகிறார். ”ஆனால், மத்திய அரசுக்கு அனுப்பி வைக்கப்பட்ட தீர்மானம் என்ன கதியானது என்பதைக்கூட வெளிப்படுத்தாமல் மறைத்து வைத்து, பல மாணவமணிகளின் உயிர்ப்பறிப்புக்குக் காரணமான மாபாதகச் செயலைச் செய்தது அ.தி.மு.க. அரசு. ஒவ்வோர் ஆண்டும் நீட் உயிர்ப்பலிகள் தொடர்ந்தபடியே இருக்கின்றன” என்று கவலை தெரிவித்துள்ளார்.

அரசு பள்ளி மாணவர்களின் கனவு

அரசுப் பள்ளிகளில் படித்த மாணவர்களின் மருத்துவக் கனவு என்பது முற்றிலுமாகச் சிதைக்கப்பட்டு விட்டதாகக் குறிப்பிடும் அவர், ”இலட்சக்கணக்கில் பணம் செலவழித்து- கார்ப்பரேட் பாணி கோச்சிங் சென்டர்களில் பயின்று – ஒருமுறைக்கு இருமுறை மூன்று முறை நீட் தேர்வு எழுதினால்தான் எம்.பி.பி.எஸ் சீட் கிடைக்கும் என்பதால் அரசுப் பள்ளிகளில் பயிலும் ஏழை மாணவர்களுக்கு மருத்துவப் படிப்பு என்பது எட்டாக்கனியாகிவிட்டது.” என்று கூறுகிறார்.

அதிமுக அரசில் இயலாமை

ஒட்டுமொத்தமாக நீட் தேர்வை ரத்து செய்யப் போராட வேண்டிய அ.தி.மு.க. அரசு, தனது இயலாமையையும் பொறுப்பற்றத்தனத்தையும் மறைப்பதற்காக, அரசுப் பள்ளி மாணவர்களுக்கு முன்னுரிமை இடஒதுக்கீடு வழங்குவது என முடிவு செய்ததாகக் கூறுகிறார். மேலும், “எந்தவகையிலேனும் – எந்த அளவிலேனும் சிறு நன்மையாவது விளையட்டும் என்கிற அடிப்படையில் தி.மு.கழகம் அதனை வரவேற்றது. ஆனால், அதையாவது அ.தி.மு.க. அரசு முறையாக நிறைவேற்றியதா? இல்லை.” அதிமுக அரசின் செயல்படா தன்மையைப் பற்றித் தெரிவிக்கிறார்.

தூசு படிந்த தீர்மானம்

சட்டமன்றத்தில் நிறைவேற்றப்பட்ட தீர்மானம், ஆளுநரின் ஒப்புதலுக்காக அனுப்பப்பட்டு, ராஜ்பவன் மேசையிலேயே தூசு படிந்து கிடக்கிறது என்பதால், அதனை விரைந்து நிறைவேற்றி, அரசுப்பள்ளி மாணவர்களின் வாழ்வில் ஒளியேற்றிட வேண்டும் என்பதை வலியுறுத்தி எதிர்க்கட்சித் தலைவர் என்ற முறையில் ஆளுநர் பன்வாரிலால் புரோகித் அவர்களுக்குக் கடிதம் எழுதியதாகக் கூறியுள்ளார்.

அதற்கு, தீர்மானம் குறித்து சட்டரீதியான ஆலோசனைகளைப் பெற வேண்டி இருப்பதால், 4 அல்லது 5 வாரங்கள் அவகாசம் வேண்டும் எனத் தெரிவித்து, ஆளுநர் பதில் கடிதம் அனுப்பியதாகக் குறிப்பிடுகிறார்.

அரசைக் கண்டித்துப் பேரணி

ஆளுநரின் ஒப்புதல் கிடைக்காத காரணத்தால், மருத்துவப் படிப்பிற்கான கலந்தாய்வு நடத்தப்படவில்லை. இதுகுறித்து எழுதும் போது, “மாணவர்களின் எதிர்காலம் வீணாகிறது. அதனால்தான், அரசுப் பள்ளி மாணவர்களுக்கான 7.5 சதவீத இடஒதுக்கீட்டிற்கு உடனடியாக ஒப்புதல் வழங்குமாறு ஆளுநரை வலியுறுத்தியும், மாநில உரிமைகளை அடமானம் வைத்துப் பதவி சுகம் அனுபவித்து, மாணவர்களின் எதிர்கால வாழ்வுக்கு வஞ்சகம் இழைக்கும் எடப்பாடி அ.தி.மு.க. அரசைக் கண்டித்தும் நேற்று (அக்டோபர் 24) மாபெரும் பேரணி நடைபெற்றது.” என்று தி.மு.கழகத்தின் சார்பில் நடந்த பேரணி பற்றி கூறுகிறார்.

நன்றி : twitter.com/mkstalin

அடமானம் வைத்த அரசு

அரசு என்பது மக்களால் தேர்ந்தெடுக்கப்பட்டது என்றும், ஆளுநர் என்பவர் மத்திய அரசால் நியமிக்கப்பட்டவர் என்றும் கூறும் அவர், அதோடு சேர்த்து, மக்கள் வழங்கிய அதிகாரத்தை மத்திய அரசிடமும் அதன் பிரநிதியான ஆளுநரிடமும் அடமானம் வைத்த அ.தி.மு.க. அரசு, இந்த இடஒதுக்கீடு விவகாரத்தில் பல உண்மைகளை மறைத்து, மாணவர்களை ஏமாற்றிக் கொண்டிருக்கிறது என்று அதிமுக அரசைச் சாடுகிறார்.

நீதிபதி பி.கலையரசன் குழு

அரசுப் பள்ளிகளில் படிக்கும் ஏழை, எளிய குடும்பங்களைச் சேர்ந்த மாணவர்களுக்கு, தமிழக அரசு அமைத்த உயர்நீதிமன்றத்தின் ஓய்வுபெற்ற நீதிபதி பி.கலையரசன் குழு, மருத்துவக் கல்லூரிகளில் 10 சதவீத இடங்களை ஒதுக்கப் பரிந்துரை செய்திருந்தது.

அதைப் பற்றிக் குறிப்பிடும் போது, “அந்தப் பரிந்துரையைத் தமிழக அரசு அப்படியே ஏற்றிருக்க வேண்டும். அப்படி ஏற்றிருந்திருந்தால், மொத்தமுள்ள அரசு ஒதுக்கீட்டு எம்.பி.பி.எஸ். இடங்களான 4,043-ல், 10 விழுக்காடு இடங்கள், அதாவது 404 இடங்கள் அரசுப் பள்ளி மாணவர்களுக்குக் கிடைத்திருக்கும்.” என்று கூறியுள்ளார்.

ஆனால் எடப்பாடி பழனிசாமி அரசு, நீதியரசரின் பரிந்துரைக்கு மாறாக, தன்னிச்சையாக, அதை 7.5 சதவீதமாகக் குறைத்தனால், 300 மாணவர்களுக்கு மட்டுமே எம்பிபிஎஸ் இடங்கள் கிடைக்கும் நிலை உருவானது என்று குறிப்பிடுகிறார்.

“எடப்பாடி பழனிசாமி அரசின் இந்தத் தன்னிச்சையான, பொறுப்பற்ற செயலால் 100 அரசுப் பள்ளி மாணவர்களுக்கான மருத்துவச் சேர்க்கை இப்போதே பறிபோய்விட்டது. நீதிபதி கலையரசன் குழு பரிந்துரைகளுக்கு மாறாக, 7.5 சதவீத இடம் தருவதுதான் நியாயமானது (reasonable) என எடப்பாடி பழனிசாமி அரசு விளக்கம் தந்தது, ஜூன் 16-ம் தேதி வந்த ‘தி இந்து’ ஆங்கில நாளிதழில் வெளியாகி இருக்கிறது.” என்று அரசின் செயலைத் தாக்கியிருக்கிறார்.

குறையும் மாணவர்கள் எண்ணிக்கை

தமிழ்வழிக் கல்வியில் பயின்ற மாணவர்கள் நீட் தேர்வு வருவதற்கு முன்பு

2015-16 கல்வியாண்டில்

அரசு மருத்துவக் கல்லூரிகளில் 456 பேரும்,

தனியார் மருத்துவக் கல்லூரிகளில் 54 பேரும்,

2016-17 கல்வியாண்டில்

அரசு மருத்துவக் கல்லூரிகளில் 438 பேரும்,

தனியார் மருத்துவக் கல்லூரிகளில் 99 பேரும்

சேர்ந்துள்ளனர் என்பது தகவல் அறியும் உரிமைச் சட்டத்தின் கீழ் தெரியவந்துள்ளதாக ஸ்டாலின் தரவுகளை வரிசைப்படுத்திருக்கிறார். அதே நேரத்தில் நீட் தேர்வு நடைமுறைக்கு வந்தபிறகு,

2017-18 கல்வியாண்டில்

அரசு மருத்துவக் கல்லூரியில் சேர்ந்த தமிழ்வழிக் கல்வி பயின்ற மாணவர்களின் எண்ணிக்கை வெறும் 40 மட்டுமே.

தனியார் மருத்துவக் கல்லூரிகளில் 12 பேருக்கு மட்டுமே இடம் கிடைத்துள்ளது.

2018-19 கல்வியாண்டில்

அரசு மருத்துவக் கல்லூரிகளில் 88 பேரும்,

தனியார் மருத்துவக் கல்லூரிகளில் 18 பேரும்.

இதிலிருந்தே நீட் தேர்வு எந்தளவுக்கு மாணவர்களுக்குப் பாதிப்பை ஏற்படுத்தியுள்ளது என்பதை உணர முடியும் என்று தெரிவித்துள்ளார்.

நீதியில் லட்சணம்

”தமிழ்நாட்டில் மொத்தம் இருக்கிற 7,968 மேல்நிலைப் பள்ளிகளில் அரசுப் பள்ளிகள் மட்டும் 3,054. பன்னிரண்டாம் வகுப்புத் தேர்வு எழுதும் மொத்த மாணவர்களில் அரசுப் பள்ளி மாணவர்கள் மட்டும் 3.4 லட்சம் பேர்.

அவர்களுக்குக் கிடைப்பதோ வெறும் 0.15 சதவீதம் மட்டுமே. இந்த நிலையில், நீதிபதி கலையரசன் குழு பரிந்துரைத்த 10 சதவீதத்தை எந்த அடிப்படையில் 7.5 சதவீதமாக எடப்பாடி அரசு குறைத்தது? இதுதான் ஏழை எளிய மாணவர்களுக்குச் செய்யும் நீதியின் லட்சணமா?” என்று அரசை நோக்கிக் கேள்வி எழுப்பியுள்ளார்.

தொடரும் கேள்விகள்

இதுபற்றி சட்டப்பேரவையில் கழக உறுப்பினர்கள் தங்கம் தென்னரசு, மாசிலாமணி ஆகியோர் கேள்வி எழுப்பியபோது முதலமைச்சர் பழனிசாமி மவுனம் சாதித்ததாகவும், அதற்கு பதில் சொல்லவில்லை என்று முதல்வரைப் பற்றிக் குறிப்பிடுகிறார்.

மேலும், “நீதிபதி கலையரசன் குழுவின் அறிக்கையை இன்றுவரை சட்டப்பேரவையிலும் தாக்கல் செய்யவில்லை. பொதுவெளியிலும் வைக்காததன் மர்மம் என்ன? யாருடைய அச்சறுத்தலுக்குப் பயந்து நடுங்கி பம்முகிறது பழனிசாமி அரசு?” என்ற கேள்விகளையும் அரசைப் பார்த்து வைக்கிறார்.

கால தாமதம்

”5 வாரங்களில் முடிவு எடுப்பதாக ஆளுநர் தெரிவித்திருந்தாலும், ஏறத்தாழ 5 மாதங்களாகவே முடிவெடுக்கப்படாமல் இருக்கிறது என்பதுதான் அ.தி.மு.க. அரசால் மறைக்கப்பட்ட உண்மை. ஆம்.. ஜூன் மாதம் 15-ம் தேதி முதல் இந்தச் சட்ட மசோதா கிடப்பில் போடப்பட்டு இருக்கிறது. ஜூன் 15-ம் தேதி தமிழக அமைச்சரவை கூடி 7.5 சதவீத ஒதுக்கீடு வழங்க அவசரச் சட்டம் இயற்றி ஆளுநருக்கு அனுப்பியது. ஆளுநர் அதைக் கிடப்பில் போடவில்லை. மாறாக, எடப்பாடி அரசுக்கே திருப்பி அனுப்பிவைத்தார்.” என்று அதிமுக அரசே கால தாமதத்தை ஏற்படுத்தவதாகக் குறிப்பிடுகிறார்.

திருத்தப்பட்ட சட்டம்

அரசுப் பள்ளிகளில் படிக்கும் மாணவர்களுக்கு மட்டும் இடஒதுக்கீடு தந்தால் போதாது, தனியார் பள்ளிகளில் கல்வி உரிமைச் சட்டத்தின்கீழ் படிக்கும் மாணவர்களுக்கும் சலுகை வழங்கும் வகையில் திருத்தம் செய்யுங்கள் என்று ஆணையிட்டு, அவசரச் சட்டத்தை ஆளுநர் திருப்பி அனுப்பியதாகக் குறிப்பிடுகிறார்.

”அதை வெளியேகூடச் சொல்லாமல், ஆளுநரின் உத்தரவைச் சிரமேற்கொண்டு நிறைவேற்றி, திருத்தம் செய்து, அவர் கேட்டவாறே எடப்பாடி அரசு அனுப்பி வைத்தது. அதன்பிறகாவது ஒப்புதல் கிடைத்ததா? அரசுப் பள்ளியில் பயிலும் ஏழை மாணவர்களுக்கான இடஒதுக்கீட்டுக்கு ஆளுநர் பன்வாரிலால் இசைவு தரவில்லை.” என்று கூறுகிறார்.

இழுத்தடிக்கும் ஆளுநர்

செப்டம்பர் 15-ம் தேதி, தமிழக சட்டப்பேரவையில் இதற்கான சட்ட மசோதா ஒருமனதாக நிறைவேற்றப்பட்டது. ஆளுநருக்கு சட்ட மசோதா அனுப்பப்பட்டு 5 வாரங்கள் கடந்துவிட்டன. இன்னும் 4 வார அவகாசம் வேண்டும் என ஆளுநர் சொல்கிறார்.

இதுகுறித்து கூறும்போது, “டெல்லி எஜமானர்கள் கண் அசைவுக்கு ஏற்ப ஆளுநர் இழுத்தடிக்கிறார். ஜூன் மாதத்தில் தமிழக அமைச்சரவை எடுத்த முடிவின் அடிப்படையில் பார்த்தால் 5 மாதங்களாக இழுத்தடிக்கப்படுகிறது. இதனை, ஏனென்று கேட்க முதுகெலும்பு உள்ள அரசு தமிழ்நாட்டில் இல்லை. அதனால்தான் திராவிட முன்னேற்றக் கழகம் கேட்கிறது. “ என்று அரசைக் கடுமையாகத் தாக்கியுள்ளார்.

அரசுக்குச் சவால்

”மாநில ஆளுநரின் செயல் கூட்டாட்சித் தத்துவத்துக்கு எதிரானது. அதிகார எல்லை மீறலானது. அதிகாரத்தில் இருக்கின்ற முதலமைச்சரும் அமைச்சர்களும் ஆளுநரிடம் தங்கள் உரிமைகளை நிலைநாட்ட வக்கற்ற – துப்பில்லாத – கையாலாகாத நிலையில், முதலமைச்சர் பழனிசாமியோ எதிர்க்கட்சித் தலைவரான என் மீது பாய்கிறார். துணிவிருந்தால் ஆளுநரிடம் உரிமைக்குரலை எழுப்பட்டும்.” என்று அரசுக்குச் சவால்விடுகிறார்.

மேலும், “ஆளுநருடனான சந்திப்பில் என்ன நடந்தது என்பதை மறைக்காமல் உரைக்கட்டும். உண்மையான அக்கறையும் – உறுதியான நிலைப்பாடும் கொண்டு அரசுப் பள்ளி மாணவர்களுக்கான இடஒதுக்கீட்டை விரைந்து நடைமுறைப்படுத்தட்டும். அதுவரை, தி.மு.கழகத்தின் போராட்டம் ஓயாது.” என்று உறுதிப்பட தெரிவித்துள்ளார்.

கனவு கனியும்

இறுதியாக, “ஊழலில் புரண்டு – பதவி சுகம் அனுபவித்து – ஆட்சியைக் காப்பாற்றிக் கொள்வதற்கான விலையாக மத்திய அரசிடம் தனது உரிமைகளைப் பறிகொடுத்திருக்கும் இந்த அடிமைக் கூட்டத்தின் ஆட்டம் அதிக காலம் நீடிக்கப்போவதில்லை.

ஆறு மாத காலத்தில் அனைத்தும் மாறும். அப்போது நீட் தேர்வு முற்றிலுமாக நீக்கப்படுவதற்குரிய உறுதியான நடவடிக்கைகள் மேற்கொள்ளப்படும். மாணவர்களின் மருத்துவக் கனவு கனிந்து நனவாகும் ; நலன் பெருக்கும்!” என்று மு.க.ஸ்டாலின் நம்பிக்கை தெரிவித்துள்ளார்.

இந்த நிலையில், பாஜக மாநில தலைவர் எல்.முருகன் இன்று செய்தியாளர்களைச் சந்தித்துப் பேசினார். அப்போது, அரசுப் பள்ளி மாணவர்களுக்கு 7.5 சதவீத இட ஒதுக்கீடு வழங்கும் மசோதா மீது முடிவு எடுக்க ஆளுநர் எடுத்துக்கொண்ட நேரம் போதும் என்றும், இனியும் காலதாமதம் ஏற்படாமல் மாணவர்களின் நலன் கருதி மசோதாவுக்கு உடனே ஒப்புதல் தரவேண்டும் என்றும் ஆளுநரைக் கேட்டுக்கொண்டார்.
aran-logo

சுதந்திர ஊடகத்தை ஆதரிக்க

உங்கள் பங்களிப்பு, அரண்செய் ஊடகத்தின் சுதந்திரத்தை உறுதி செய்கிறது. இதன் மூலம் எங்களால் தொடர்ந்து சிறந்த செய்திகளை அனைவருக்கும் வழங்க முடியும். உங்கள் பங்களிப்பு எவ்வளவு சிறிதாயினும் அல்லது பெரிதாயினும் அது எங்களின் எதிர்காலத்திற்கு மிகவும் அவசியமானது.

மற்ற சில பதிவுகள்