Aran Sei

பங்குச் சந்தையின் வரலாறு காணாத வளர்ச்சி யாருக்கு நல்லது? – அருண் கார்த்திக்

டந்த சில நாட்களாகப் பங்குச் சந்தை புதிய உச்சத்தைத் தொட்டுக் கொண்டு இருப்பதாகச் செய்திகள் வந்துகொண்டே இருக்கின்றன. பங்குகளின் விலைகளும் உச்சத்தைத் தொடுகின்றன, பங்குச் சந்தை குறியீடுகளான நிஃப்டி மற்றும் சென்செக்ஸ் உச்சத்தைத் தொடுகின்றன.

மற்றொருபுறமோ, பொருளாதாரம் வளர்ச்சி அடையாமல் வீழ்கிறது என்று அரசே சொல்கிறது. ரிசர்வ் வங்கி கூட அதையே தான் சொல்கிறது.

பொதுவாக நமக்குச் சொல்லப்படுவது என்ன? பங்கு சந்தை வளர்ச்சி என்பது பொருளாதார வளர்ச்சியைக் குறிக்கிறது என்பது, அல்லது, பொருளாதாரம் வளர்ந்தால் பங்கு சந்தையும் வளரும் என்பது.

ஆனால், இப்போது நமக்குக் காலம் காலமாகச் சொல்லப்பட்டதற்கு முரணாக நடந்துகொண்டு இருப்பதை நம்மால் பார்க்க முடிகிறது. பொருளாதாரமும் பங்கு சந்தையும் எதிர் எதிர் திசையில் செல்கின்றன.

‘தனியார் தலையீட்டை எதிர்க்கிறோம்’ – விவசாயிகள் சொல்வது சரியா? – அருண் கார்த்திக்

“பங்குச் சந்தை வளர்ந்தால் பொருளாதாரம் வளர்கிறது” என்ற கருத்து தர்க்கமே இல்லாமல் வெறுமனே சொல்லப்படும் கருத்து அல்ல. ஆகையால், முதலில் அந்தக் கருத்துக்குப் பின்னால் இருக்கும் தர்க்கத்தையும் , அதன் தொடர்ச்சியாக “பொருளாதாரம் வளர்ந்தால் நாட்டு மக்களுக்கு நல்லது” என்ற கருத்துக்குப் பின்னால் இருக்கும் தர்க்கத்தையும் நாம் புரிந்துகொள்ள வேண்டும்.

பங்கு என்றால் என்ன? 

ஒருவர் 10 லட்சம் ரூபாய் முதலீட்டுடன் ஒரு தொழில் துவங்குகிறார். அந்தத் தொழில் நல்ல லாபத்தில் இயங்குகிறது. ஆகையால், தொழிலை விரிவாக்கம் செய்யலாம் என்று நினைக்கிறார். ஆனால் விரிவாக்கம் செய்ய அவரிடம் பணம் இல்லை. பொதுமக்களிடம் பங்குகளை விற்றுப் பணம் திரட்டலாம் என்று முடிவு செய்கிறார். ஒரு பங்கு 10 ரூபாய் என்று விலை நிர்ணயம் செய்து 1 லட்சம் பங்குகளை விற்பனை செய்கிறார். பலருக்கு இந்த நிறுவனம் பற்றித் தெரிந்ததால் அனைத்து பங்குகளும் விற்று தீர்ந்து விடுகின்றன.

சிலர் 10 பங்குகள் வாங்கி இருந்தனர், சிலர் 100 வாங்கியிருந்தனர், அவரவர் அவரவர் விருப்பத்துக்கு ஏற்ப வாங்கி இருந்தனர். பங்கு விற்றதின் மூலம் வந்த பணத்தை முதலீடு செய்து தொழிலை விரிவாக்கம் செய்கிறார். மொத்தமாகத் தொழிலில் இருந்து வரும் லாபத்தை யார் யார் எவ்வளவு முதலீடு செய்திருக்கிறார்களோ, எத்தனை பங்குகள் அவர்களிடம் உள்ளதோ, அதற்கு ஏற்றபடி விகிதாச்சார அடிப்படையில் லாபம் பிரித்துத் தரப்படுகிறது.

சிறிது காலத்துக்குப் பிறகு, பங்குகளில் முதலீடுகள் செய்த சிலருக்குப் பணத் தேவை ஏற்படுகிறது. ஆகையால் அவர்களுடைய பங்குகளை விற்க முடிவு செய்து பங்கு சந்தையில் விற்கின்றனர். இதே சமயம், இந்த நிறுவனத்தின் பங்குகளில் முதலீடு செய்யாமல் நிறுவனத்தைக் கவனித்துக் கொண்டிருந்தவர்கள், இந்த நிறுவனம் நன்கு லாபம் ஈட்டுவதால் 10 ரூபாய் மதிப்புள்ள பங்குகளை 15 ரூபாய் வரை கொடுத்து வாங்க தயாராக இருகின்றனர். பணத் தேவை இருந்த பங்கு தாரர்கள் விற்க, பங்குகளை வாங்க நினைத்தவர்கள் 10 ரூபாய்க்கு அதிகம் கொடுத்து வாங்கிக்கொள்கின்றனர். இவ்வாறு பங்குகள் வாங்குவதும் விற்பதும் தொடர்கிறது.

பங்குச் சந்தை இழப்புகள்: உண்மையா? கற்பனையா?

நிறுவனம் நன்கு லாபம் ஈட்டிக்கொண்டே இருப்பதால் பங்கு சந்தையில் பங்குகளின் விலையும் 15, 20 என அதிகரித்துக்கொண்டே இருக்கிறது. நன்கு லாபம் வருவதால் நிறுவனத்தின் நிறுவனர் நிறுவனத்தை இன்னும் விரிவாக்கம் செய்ய முடிவு செய்து, முன்பு போலவே 10 ரூபாய் மதிப்புள்ள ஒரு லட்சம் பங்குகளை விற்க முடிவு செய்து, விற்கிறார். அந்தப் பங்குகளும் பிறகு பங்கு சந்தையில் வர்த்தகம் ஆகின்றன.

இது மிகவும் எளிமைப்படுத்தப்பட்ட எடுத்துக்காட்டாக இருந்தாலும், இதுபோலத் தான் நிறுவனங்கள் பங்குகளை வெளியிடுகின்றன, பங்குகள் பங்கு சந்தைகளில் வாங்க-விற்க படுகின்றன. எவ்வளவு பேர் வாங்குகிறார்கள் விற்கிறார்கள் என்பதைப் பொறுத்து பங்கு விலையும் மாறுகிறது.

இந்தியாவில் மும்பை பங்கு சந்தை, தேசிய பங்கு சந்தை என்ற இரண்டும் தான் முக்கியமான பங்கு சந்தைகள். மும்பை பங்கு சந்தையில் வர்த்தகமாகும் சந்தை மதிப்பின்படியான பெரிய 30 நிறுவனங்களின் விலை ஏற்ற இறக்கத்தைக் குறிப்பது தான் சென்செக்ஸ் (Sensex) எனும் குறியீடு/ அதே போல் தேசிய பங்கு சந்தையின் 50 பெரிய நிறுவனங்களின் பங்கு விலையின் குறியீடு நிஃப்டி (Nifty). இந்தக் குறியீட்டுப் புள்ளிகள் அதிகரித்தால் பங்குகள் விலை அதிகரிக்கிறது என்றும் குறைந்தால் பங்குகள் விலை குறைகிறது என்றும் பொருள்.

பங்கு சந்தை உயர்ந்தால் பொருளாதாரம் உயர்கிறதா?

நாம் மேலே பார்த்த எடுத்துக்காட்டில் அந்த நிறுவனம் நன்கு லாபகரமாகச் செயல்படுவதால் அதன் பங்கின் விலை தொடர்ந்து அதிகரிக்கிறது. லாபம் அதிகமாக இருப்பதால் நிறுவனம் தொடர்ந்து விரிவாக்கமும் செய்யப்படுகிறது. பின்நோக்கிய தர்க்கம் (Reverse logic) படி பார்த்தால், ஒரு பங்கின் விலை அதிகரிக்கிறது என்றால் அந்த நிறுவனம் நன்றாக லாபகரமாகச் செயல்படுகிறது என்று சொல்ல முடியும். லாபகரமாகச் செயல்பட்டால் அந்த நிறுவனம் விரிவாக்கம் செய்யப்படும். விரிவாக்கம் செய்தால் நாட்டின் பெருளாதரம் வளர்வது மட்டுமல்லாமல் புதிய வேலைவாய்ப்புகள் உருவாகும், எனவே நாட்டு மக்களுக்கு நல்லது.

பங்கு சந்தையின் குறியீட்டு எண் அதிகரிக்கிறது என்றால் பங்கு சந்தையில் வர்த்தகமாகும் அனைத்து பங்குகளும், அனைத்தும் இல்லாவிட்டாலும் அதிகப்படியான பங்குகள், விலை உயர்கிறது என்று அர்த்தம். அதாவது அனைத்து நிறுவனங்களும் நன்கு லாபகரமாகச் செயல்படுகின்றன. எனவே, புதிய வேலை வாய்ப்புகள் உருவாகப் போகிறது என்று பொருள்.

பங்குச் சந்தையில் ஐபிஓ பரபரப்பு : ஷியாம் சுந்தர்

இந்தத் தர்கத்தை வைத்து தான் பங்கு சந்தை உயர்ந்தால் நாட்டுக்கு நல்லது என்று சொல்லி வந்தார்கள்.

ஆனால். தற்போது பொருளாதாரம் சரிவடைந்து கொண்டிருக்கிறது, வேலைவாய்ப்பின்மை வரலாறு காணாத அளவில் இருக்கிறது, இருந்தும் பங்கு சந்தை வரலாறு காணாத உச்சத்துக்குப் போய்க் கொண்டு இருக்கிறது. பங்கு சந்தை மிகவும் அதிக உயரத்துக்குப் போகிறது என்று ரிசர்வ் வங்கி ஆளுநரே சொல்லும் அளவுக்குப் போய்க் கொண்டு இருக்கிறது.

இதுவரை நம்ப பட்டு வந்த, “பங்கு சந்தை உயர்வு பொருளாதாரத்துக்கு நல்லது” என்ற கருத்துக்கும், இயல்பில் நடப்பதற்கும் இருக்கும் முரணுக்கு காரணம் என்னவாக இருக்கும்? பார்ப்போம்.

முதலில், ஒரு நிறுவனத்தின் செயல்பாடு அல்லது அந்த நிறுவனம் தயாரிக்கும் பொருளுக்கு இருக்கும் தேவை, இவைதான் அந்த நிறுவனத்தின் பங்கின் விலையைத் தீர்மானிக்கிறது என்ற கருத்தே ஒரு மாயை. இவை இல்லாவிட்டால் எது தீர்மானிக்கிறது? பங்கின் விலை ஏற்ற இறக்கத்துக்குப் பல காரணங்கள் உண்டு, சிலவற்றைப் பார்ப்போம்.

முதல் காரணம், அமெரிக்காவில் நிலவும் குறைந்த வட்டி விகிதம். அமெரிக்க ஐக்கிய நாடுகளின் பொருளாதாரம் வீழ்ச்சி அடைந்து கொண்டே வருவதால், அந்தப் பொருளாதாரத்தை மீட்க அங்கு உள்ள ரிசர்வ் வங்கியான ‘பெடரல் ரிசர்வ்’ வட்டிவிகிதத்தைக் குறைத்து கிட்ட தட்ட பூஜ்ஜியமே ஆக்கிவிட்டது. வட்டி விகிதம் மிகவும் குறைவாக இருப்பதால் அங்குச் செய்யப்படும் முதலீடுகளுக்குக் கிடைக்கும் லாபமும் மிகவும் குறைவு. இந்த லாபம் விரைவில் அதிகரிப்பதற்கான சாத்தியக்கூறுகள் எதையும் காணவில்லை. இதே நிலைதான் எல்லா வளர்ந்த பொருளாதாரங்களிலும். இதனால் முதலீட்டாளர்கள் இந்தியாவில் முதலீடு செய்கிறார்கள். எப்போது அமெரிக்காவிலோ அல்லது வேறு ஏதாவது வளர்ந்த பொருளாதாரத்திலோ வளர்ச்சிக்கான அறிகுறி தெரிகிறதோ, அப்போது இங்கு முதலீடு செய்தவர்கள் பணத்தை எடுத்துக்கொண்டு போய் விடுவார்கள். அந்நிய முதலீட்டாளர்கள் விற்க ஆரம்பித்தால் பங்கு சந்தை கிடு கிடு எனக் குறைந்துவிடும். அமெரிக்காவின் பொருளாதாரமே பல காரணங்களால் தீர்மானிக்கப் படுகிறது. ஊதி பெருக்கப்பட்ட, செக்யூரிட்டீஸ் எனப்படும் வர்த்தகம் செய்யக்கூடிய முதலீடுகளால், 2008 ஆம் ஆண்டு, எவ்வாறு அமெரிக்காவின் பொருளாதாரம் அடி வாங்கியது என்று நாம் பார்த்தோம். பிரச்சனை, அங்கே நடக்கும் கிறுக்குத்தனங்கள், இங்கே பங்கு சந்தையை முடிவு செய்வது தான்.

13500 கோடி வங்கி மோசடி செய்த நீரவ் மோடி வழக்கு – பிப்ரவரி 25-ல் தீர்ப்பு

இரண்டாவது காரணம், இந்திய ரிசர்வ் வங்கி பணப் புழக்கத்தை அதிகரித்தது. கொரோனா ஊரடங்குக்குப் பிறகு இந்திய பொருளாதாரம் தேக்கம் அடைய தொடங்கியது. தேக்கத்தின் காரணமாக அனைத்து நிறுவனங்களுக்கும் வியாபாரம் குறைந்து அந்த நிறுவனங்கள் பண வரவு இல்லாமல் தத்தலிக்கத் தொடங்கின. இந்த நிறுவனங்களுக்குக் குறைந்த வட்டியில் கடன் கிடைத்தால், அந்த நிறுவனங்கள் தேக்கத்தில் இருந்து மீண்டுவிடும் என்று இந்திய ரிசர்வ் வங்கி வட்டி விகிதத்தைக் குறைத்து. கடன் வழங்கும் வசூலிக்கும் நடைமுறைகளைத் தளர்வு செய்து, சந்தையில் பணப் புழக்கத்தை அதிகரித்தது. இதை liquidity infusion என்று சொல்வார்கள். பணப் புழக்கம் அதிகரிக்கும் நடவடிக்கையால் இரண்டு விளைவுகள் ஏற்பட்டன. ஒன்று, வட்டி விகிதம் மிகவும் குறைந்த காரணத்தால் வட்டி வரும் முதலீடுகள் செய்திருந்தவர்கள் அந்த முதலீடுகளைத் திரும்பப் பெற்று பங்கு சந்தை அல்லது பரஸ்பர நிதி (mutual fund) போன்றவற்றில் முதலீடு செய்தனர். இதுவும் பங்குகளின் விலை உயர்வதற்கு ஒரு காரணம். இரண்டாவது, சந்தையில் குறைந்த வட்டிக்கு பணம் கிடைத்ததால், பல இந்திய நிறுவனங்கள் கடன் வாங்கித் தங்களுடைய பங்குகளைத் தாங்களே வாங்கிக் கொண்டன, இதை Share buy back என்று சொல்வார்கள். பங்குகளின் விலை அதிகரிக்க இதுவும் ஒரு காரணம்.

ஊரடங்குக்குப் பிறகு பொருளாதாரத்தை மீட்க குறைத்த வட்டியில் பணத்தை வழங்கியதின் எதிர்பார்க்காத விளைவு (Unintended consequence) என்று, பங்கு சந்தை உயர்வை பற்றி ரிசர்வ் வங்கி ஆளுநர் சக்திகாந்த தாஸ் கூறியுள்ளார்.

மூன்றாவது காரணம், கிறுக்குத்தனமான காரணங்கள். சமீபத்தில் நடந்த ஒரு நிகழ்வை சொன்னாலே இதை ஏன் கிறுக்குதனமான காரணம் என்று சொல்கிறோம் என்று புரியும். வாட்ஸ்ஏப் (whatsapp) நிறுவனம், தனியுரிமை கொள்கைகளை (privacy policies) மாற்றுவதாக சமீபத்தில் அறிவித்தது. அதை தொடர்ந்து பலர் வாட்ஸ்ஏப்-இல் இருந்து வெளியேறி அதே போன்ற வேறு செயலிகளை உபயோகப்படுத்த துவங்கினர். இதில் அதிகம் பேசப்பட்ட மாற்று செயலியின் பெயர் சிக்னல் (signal). இது எல்லாம் பேசுபொருளாக இருந்த சமயத்தில் டெஸ்லா கார் நிறுவனத்தின் தலைவர் எலான் மஸ்க் (Elon Musk), “signal” என்ற வார்த்தையை டிவீட் செய்திருந்தார். பின்னர் அவர் அதை தவறுதலாக டிவீட் செய்துவிட்டதாக சொன்னாலும், டிவீட் செய்தவுடன் என்ன நடந்தது என்பது தான் செய்தி. சிக்னல் என்ற வார்த்தையை மஸ்க் டிவீட் செய்தவுடன், சிக்னல் நிறுவனத்தின் பங்கின் விலை 100 சதவீதத்துக்கு மேல் அதிகரித்தது. சரி, வாட்ஸ்ஏப்-இல் இருந்து வெளியேறியவர்கள் அதிகம் சிக்னல் செயலியை பயன்படுத்த துவங்குவதால் தான் சிக்னல் பங்கு விலை ஏறுகிறது, எலான் மஸ்க்-கின் டிவீட், அதற்கு வலு மட்டும்தான் சேர்த்தது என்று ஒரு காரணம் சொல்லலாம். ஆனால் அங்கு தான் கதையில் ட்விஸ்ட். சிக்னல் செயலியை வைத்திருக்கும் நிறுவனம் பங்குசந்தையிலேயே இல்லை. பிறகு விலை ஏறிய சிக்னல் நிறுவனம்? சிக்னல் செயலிக்கும், பங்கு சந்தையில் விலை அதிகமான சிக்னல் நிறுவனத்துக்கும் எந்த தொடர்பும் இல்லை. இதனால் தான் இதை கிறுக்குதனமான காரணம் என்று சொல்கிறோம்.

இவை போல பங்குகளின் விலை உயர பல காரணங்கள் உண்டு.

நாம் புரிந்துகொள்ள வேண்டியது என்னவென்றால், “ஒரு நிறுவனத்தின் செயல்பாடுதான் அந்தப் பங்கின் விலையை முடிவு செய்கிறது” என்ற கருத்து முற்றிலும் உண்மை இல்லை என்பதுதான்.

இந்தத் தர்கத்தைக் கொஞ்சம் நாம் விரிவாக்கினால் பங்கு சந்தை உயர்வு என்பது எப்போதும் பொருளாதாரத்துக்கு நல்லதாக இருக்க வேண்டியது இல்லை என்பதைப் புரிந்துகொள்ள முடியும். எனவே, மக்களுக்கும் நல்லதாக இருக்கத் தேவை இல்லை என்பதையும் நாம் புரிந்துகொள்ள முடியும்.

இந்த மாதிரி ஒரு நிலையைத் தான் நாம் இப்போது பார்த்து வருகிறோம். பங்கு சந்தை உயர்கிறது ஆனால் பொருளாதாரம் சுருங்குகிறது.

பங்கு சந்தை என்னமோ ஆகிவிட்டு போகட்டும். அதைப் பற்றிச் சாதாரண மக்கள் எதற்குக் கவலைப்பட வேண்டும்? அவர்கள் என்ன பங்கு சந்தையில் முதலீடா செய்துள்ளார்கள்? என்ற கேள்வி எழும். ஞாயமான கேள்வி தான். ஆனால் இதற்கு இரண்டு காரணங்கள் உண்டு.

`உணவு இல்லை, வேலை இல்லை’- தொற்றுநோயால் ஏற்பட்ட பொருளாதார விளைவுகள்

பங்கு சந்தை உயர்வு நாட்டுக்கு நல்லது, பங்கு சந்தை இறக்கம் என்பது நாட்டுக்கு கேடு என்ற கருத்து நமது ஆட்சியாளர்களை மிகவும் பற்றியுள்ளது. இதனால் தான் எப்போதெல்லாம் பங்கு சந்தை வீழ்ச்சி அடைகிறதோ அப்போது எல்லாம் உடனே அது பெரிய செய்தி ஆகிறது, ஆக்க படுகிறது. உடனே நிதி அமைச்சர் தலையீடு செய்து பங்கு சந்தை வீழ்ச்சியைத் தடுக்க உடனடி நடவடிக்கைகள் எடுக்கிறார். 2008-இல் பங்குசந்தை வீழ்ச்சி அடைந்த பொழுது அப்போதைய நிதி அமைச்சர் மும்பைக்கு நேரில் சென்று உங்களை அரசு கைவிட்டு விடாது என்று முதலீட்டாளர்களுக்கு ஊக்கம் அளித்தார். பல லட்சம் விவசாயிகள் மும்பை பங்கு சந்தை இருக்கும் அதே மாநிலமான மஹாராஷ்டிராவில் தற்கொலை செய்த பொழுது, எந்த அமைச்சரும் விவசாயிகளை நேரில் சந்தித்து, அரசு உங்களைக் கைவிடாது என்று ஊக்கம் அளிக்க வில்லை என்பது இங்குக் குறிப்பிடத்தக்கது. எனவே பங்கு சந்தைக்கும் பொருளாதார வளர்ச்சிக்கும் சம்பந்தம் இல்லை என்பதை ஆட்சியாளர்கள் ஏற்காத வரையில், அவர்கள் கவனம் முழுவதும் பங்கு சந்தையிலேயே இருக்கும். அதிலும் இப்போது இருக்கும் ஆட்சியாளர்கள், பங்கு சந்தை வளர்ச்சியைக் காட்டி “பாருங்க எங்க ஆட்சியில் உலகப் பொருளாதாரமே வீழ்ந்தாலும் மோடியின் செயல்பாடுகளால் இந்திய பொருளாதாரம் எப்படி வளர்கிறது” என்று சொல்ல கூடியவர்கள்.

இரண்டாவது காரணம் முதல் காரணத்துடன் தொடர்புடையது. எந்தச் சமயத்திலும் பங்குகளின் விலைக்கும் சம்பந்தப்பட்ட நிறுவனங்களின் செயல்பாட்டுக்கும் முற்றிலும் தொடர்பு இருக்காது. அதாவது, நிறுவனத்தின் செயல்பாட்டை மட்டுமே அடிப்படையாகக் கொண்டு பங்கு விலை இருக்காது. மற்ற காரணிகளும் பங்கின் விலையை முடிவு செய்யும். இருந்தாலும், பங்கின் விலை என்பது எந்த அளவுக்குச் செயல்பாட்டின் அடிப்படையில் முடிவு செய்யப்படுகிறது என்பது முக்கியம். நிறுவனம் கொஞ்சம் வளர்ச்சி அடைகிறது, ஆனால் பங்கின் விலை அந்த வளர்ச்சியை விட அதிகமாக வளர்கிறது. இது ஒரு அளவுக்கு ஏற்றுக்கொள்ளக் கூடியது. அதே சமயம், ஒரு நிறுவனத்தின் செயல்பாடுகள் குறைந்துள்ளன ஆனால் பங்கின் விலை ஏறுகிறது, அதுவும் வேகமாக ஏறுகிறது. இது சிக்கலான விலை ஏற்றம்.

இப்போது பங்கு சந்தை அடைந்து வரும் வளர்ச்சி என்பது இரண்டாவது வகை. நிறுவனங்களின் செயல்பாடுகள் குறைந்து வரும் சமயத்தில் பங்குகள் மிக வேகமாக விலை உயர்கிறது. இப்படிப்பட்ட வளர்ச்சி என்பது ஒரு நீர் குமிழி வளர்வது போல. அது எப்போது வேண்டுமானாலும் உடையும். அப்படி உடையும் பொழுது, பங்கு சந்தை வீழ்ச்சி அடையும். பங்கு சந்தை வீழ்ச்சி என்பது நாட்டுக்கு மிகவும் கேடு என்று ஆட்சியாளர்கள் தீர்க்கமாக நம்புவதால், மக்களுக்காகச் செலவு செய்ய வேண்டிய மக்கள் வரிப்பணத்தைப் பங்கு சந்தையை வீழ்ச்சி அடைவதில் இருந்து தடுப்பதற்குச் செலவு செய்வார்கள். ஆக, சமூக நலத்திட்டங்களுக்கு வர வேண்டிய பணம் வராமல், மக்கள் பாதிப்பு அடைவார்கள்.

எனவே “பங்கு சந்தை வளர்ச்சி நாட்டுக்கு நல்லது” என்ற கருத்து சாதாரண மக்களின் வாழ்வில் அதிகமான அளவு பாதிப்பை ஏற்படுத்த கூடிய கருத்து.

பங்கு சந்தை வளர்ச்சிதான், நாட்டுக்கு நல்லது என்ற கருத்தை ஆட்சியாளர்கள் நம்பாவிட்டாலும் இதையே தான் செய்வார்கள். ஏனென்றால் பங்கு சந்தை வளர்ந்தால் மிகவும் பயன் பெறுவதும், வீழ்ச்சி அடைந்தால் மிகவும் பாதிக்கப் படுவதும், பெரும் முதலாளிகள் தான். அந்த முதலாளிகள் கொடுக்கும் நன்கொடையில் தான் ஆட்சியாளர்கள் ஆட்சியைப் பிடிக்கிறார்கள். ஆகையால் அவர்களுடைய நலனை பாதுகாக்க கண்டிப்பாகப் பங்கு சந்தை மீது கவனம் செலுத்துவார்கள்.

மொத்தத்தில், பங்கு சந்தையின் வரலாறு காணாத வளர்ச்சி என்பது சாதாரண மக்களுக்குச் சம்பந்தப்பட்டது என்பது மட்டுமல்ல, அது அவர்களின் வாழ்க்கையை மிகவும் பாதிக்கக்கூடியதும் ஆகும். எனவே, மக்கள் நலனில் அக்கறை உள்ளவர்கள், பங்கு சந்தை வளர்ச்சிக்கு முக்கியத்துவம் கொடுப்பதைக் கேள்வியெழுப்ப வேண்டும்.

(கட்டுரையாளர் அருண் கார்த்திக், ஐஐடி கான்பூரில் எம்பிஏ படித்தவர். தற்போது ஒரு மேலாண்மை கல்லூரியில் உதவிப் பேராசிரியராக பணியாற்றி வருகிறார்)

சுதந்திர ஊடகத்தை ஆதரிக்க

உங்கள் பங்களிப்பு, அரண்செய் ஊடகத்தின் சுதந்திரத்தை உறுதி செய்கிறது. இதன் மூலம் எங்களால் தொடர்ந்து சிறந்த செய்திகளை அனைவருக்கும் வழங்க முடியும். உங்கள் பங்களிப்பு எவ்வளவு சிறிதாயினும் அல்லது பெரிதாயினும் அது எங்களின் எதிர்காலத்திற்கு மிகவும் அவசியமானது.

மற்ற சில பதிவுகள்